AQSh-ta oq-dári zaýytynda jarylys boldy

ASTANA. KAZINFORM – AQSh-taǵy áskerı zaýyttaǵy jarylystan birneshe adam qaza tapty jáne joǵalyp ketti, dep habarlaıdy Euronews.

AQSh-ta oq-dári óndiretin áskerı zaýyttaǵy jarylys saldarynan birneshe adam qaza taýyp, birqatary iz-túzsiz joǵalyp ketti. 

Qaıtalama jarylystar qutqarýshylarǵa otqa oranǵan ǵımaratqa jaqyndaýǵa múmkindik bermeı otyr.

Kýágerlerdiń aıtýynsha, jarylystyń dybysy birneshe shaqyrym jerden estilgen. Oqıǵa Tennessı shtatyndaǵy Accurate Energetic Systems zaýytynda bolǵan.

Kompanııanyń saıtynda kórsetilgendeı, kásiporyn jarylǵysh zattardy óndirý jáne synaqtan ótkizý jumystaryn ormandy jerde ornalasqan segiz ǵımaratta júrgizedi. Bul nysan shtat astanasy Neshvıllden ońtústik-batysqa qaraı 97 shaqyrym jerdegi Baksnort qalasynyń mańynda ornalasqan.

— Qazirgi ýaqytta birneshe adam iz-túzsiz joǵalǵandar qatarynda. Biz olardyń otbasylaryna jáne bul jaǵdaıǵa asa nazar aýdaryp otyrmyz, — dedi Hamfrıs okrýginiń sherıfi Krıs Devıs baspasóz máslıhatynda.

Jarylystyń sebebi birden anyqtalǵan joq, al sherıf Krıs Devıstiń aıtýynsha, tergeý birneshe kúnge sozylýy múmkin.

Tennessı shtatynyń tótenshe jaǵdaılar jónindegi agenttigi zardap shekkenderdiń bar ekenin rastady, biraq naqty sanyn jarııalaǵan joq. Agenttiktiń baspasóz hatshysy Krıstın Koýlterdiń aıtýynsha, bul aqparatty Densaýlyq saqtaý departamenti áli rastaǵan joq.

Kórshiles Dıkson qalasynyń respýblıkashyl ókili Djodı Barrett zaýyttyń óńirdegi negizgi jumys berýshilerdiń biri ekenin aıtyp, jarylystyń múmkin ekonomıkalyq saldaryna alańdaýshylyq bildirdi.

— Biz shamamen 15 mıl jerde turamyz, jáne úıimizdiń ishinde anyq estidik. Dybys úıdiń shatyryn jaryp ótken sekildi boldy, — dedi Barrett.

Aıta ketelik Ulybrıtanııadaǵy ónerkásip qoımasynda kúshti jarylys bolǵan edi.