AQSh-ta mysyqqa arnalǵan esikke aıýdyń basy qystyrylyp qaldy
ASTANA. QazAqparat - AQSh-tyń Aıdaho shtatyndaǵy turǵyn úılerdiń birinde esiktegi mysyq pen ıttiń kirip shyǵýyna arnalǵan tesikke orman taǵysy qońyr aıýdyń basy qystyrylyp qaldy. Muny sýretke túsirip alǵan úı ıesi áleýmettik jeli arqyly tanymal bolyp shyǵa keldi, dep jazady sheteldik BAQ.
Áleýmettik jelide sýret taratqan Dýg Harder esimdi shtat turǵyny aıýdyń úıine qalaı «qonaqqa» kelgenin aıtqan. Budan bir kún buryn aıý onyń úıine kelip, ashyq qalǵan esikten kirgen. Úıdi talqandap, tamaqtardy jep ketken eken. Dánikken aıý sol izimen erteńinde qaıtyp kelgende esik jabyq bolǵan. «Timiskilep júrip esiktegi tesikke endi basy qystyrylyp qaldy», dep jazady kúlkige qaryq bolǵan úı ıesi. Osydan keıin ol veterınarlardy kómekke shaqyryp, qutqarýshylardyń kómegimen aıýdan qutylǵan.
