AQSh-ta Meıirim Nursultanovtyń kásipqoı bokstaǵy alǵashqy jekpe-jegi ótedi
ASTANA. QazAqparat - Meıirim Nursultanovtyń kásipqoı bokstaǵy debıýttik jekpe-jegi 19 qarasha kúni (Astana ýaqytymen 20 qarasha) AQSh-tyń Nevada shtaty Las Vegas qalasynda «T-Mobile Arena»-da ótedi, dep habarlaıdy QazAqparat dodasport.kz-qa silteme jasap.
Kovalev-Ýord boks keshiniń shymyldyǵyn Meıirim Nursultanov ashpaq.
Áýesqoı rıngpen qatar «Astana Arlandary» sapynda el namysyn qorǵap júrgen boksshymyz kásipqoı rıngtegi alǵashqy kezdesýinde amerıkalyq Monreko Goldstonmen (5-0-1, 3KO) judyryqtasady.
Tórt raýndqa josparlanǵan bul kezdesýdi Nursultanov 160 fýnt ıaǵnı 72,6 keli salmaq dárejesinde ótkizedi.
Boks keshi HBO PPV (aqyly) túrinde taratylady, biraq otandasymyzdyń kezdesýi tikeleı efırde ótýi jaıly aqparat joq.
«Astana Arlans» klýby sapynda 2013 jyldan beri judyryqtasyp kele jatqan Meıirim ózin san qyrynan tanytty. Talaı qaýqarly qarsylastaryn qapy qaldyryp, komandasyna mańyzdy upaı syılady. Degenmen ulttyq komandanyń negizgi quramyna kóp ilige alǵan joq. Óıtkeni, 75 kelige deıingi salmaqta Jánibek Álimhanuly bar. Meıirim Nursultanov - eńbekqor, namysqoı boksshy. Búginde Meıirim qazaqstandyq kásipqoı boksshylar Madııar Áshkeev jáne Asxat Ýálıxanovpen birge "Main Event" promoýterliginde jattyǵyp júr.
Meıirim Nursultanovtyń AQSh-taǵy qarsylasyna kelsek, 26 jastaǵy amerıkalyq boksshy kásipqoı rıngke alǵash ret 2013 jyldyń 13 mamyr kúni kóterildi. Osy kezge deıin 158 ben 171 fýnt salmaqtary arasynda kezdesýler ótkizgen, sońǵy qarsylasy Robert Sýınımen (3-3-0) bolǵan kezdesýde upaı sany boıynsha teń tústi.
