AQSh-ta laıyqty ómir súrý úshin 5,3 mln dollar qajet
ASTANA. KAZINFORM — AQSh-ta laıyqty ómir súrý quny azamattardyń tabysynan jyldam ósip jatyr, sebebi turǵyn úıge ıelik etý, balalardy tárbıeleý jáne kolledjde oqý aqysyn tóleý shyǵyndary aıtarlyqtaı kóbeıdi, dep habarlaıdy Kazinform agenttiginiń Vashıngtondaǵy menshikti tilshisi FOX Business-ke silteme jasap.
Investopedia taldaýyna sáıkes, AQSh turǵyndarynyń ómir boıy jaıly ómir súrýi úshin qajet qarajat kólemi bir jyldyń ishinde 4,1 paıyz artqan.
2025 jyly 5,11 mln dollar bolǵan bul soma 2026 jyly 5,32 mln dollarǵa jetip, bir jylda 208 myń dollardan astam qosylǵan.
Atalǵan qun jalaqyǵa qaraǵanda áldeqaıda ósken. AQSh Eńbek statıstıkasy bıýrosynyń málimetinshe, maýsym aıyna deıingi 12 aıda jeke sektordaǵy ortasha jalaqy 3,1 paıyz artqan.
Investopedia júrgizgen Halyq sanaǵy bıýrosynyń taldaýy boıynsha, bakalavr dárejesi bar tolyq jumys kúnimen jumys isteıtin jumysshy ómir boıy (25 jastan 64 jasqa deıin) tabys salyǵyn eseptemegende shamamen 3,6 mln dollar tabady. Áleýmettik qamsyzdandyrý tólemderin qosqanda, bul soma 4,1 mln dollarǵa jýyqtaıdy. Sonyń ózinde AQSh-ta laıyqty ómir súrýge qajetti qarajattan 1,2 mln dollarǵa tómen.
Turǵyn úıge ıelik etý quny eń kóp ósim kórsetken. 2025 jyly 1,18 mln dollar bolǵan ómir boıǵy shyǵyn 2026 jyly 1,27 mln dollarǵa jetip, 91 myń dollardan astam artqan. Bul ótken jylmen salystyrǵanda 7,7 paıyz joǵary.
Bul esepke ortasha quny 420 myń dollar turatyn jeke úıdiń bastapqy 20% jarnasy, jyldyq 6,32% mólsherlememen alynǵan 30 jyldyq ıpoteka (paıyzymen qosa shamamen 837 myń dollar), sondaı-aq saqtandyrý, múlik salyǵy, úıdi kútip ustaý jáne kommýnaldyq qyzmetterge jyl saıyn jumsalatyn 3 057 dollar kiredi. Sońǵy shyǵyndar 30 jylda taǵy 438 myń dollar bolady.
Investopedia dereginshe, bala tárbıeleý men kolledjde bilim alý shyǵyndary eń joǵary qarqynmen ósip, 2025 jylǵy 876 092 dollardan 2026 jyly 953 763 dollarǵa jetken. Bir jylda bul soma 8,9 paıyzǵa kóbeıgen.
Sondaı-aq eki jańa avtokólik satyp alý, saqtandyrý, tehnıkalyq qyzmet kórsetý, tirkeý jáne janarmaı qunyn qosa eseptegendegi jalpy shyǵyn bir jylda 0,5 paıyz ósip, 1 205 627 dollar bolǵan.
Investopedia zertteýindegi sanattardyń ishinde densaýlyq saqtaý salasyna jumsalatyn ómir boıǵy qarajat qana ótken jylmen salystyrǵanda 0,2 paıyz túsip, 413 271 dollardy quraǵan.
Buǵan deıin 2026 jyly álemde ómir súrýge jáne kásip júrgizýge qolaıly qalalar reıtıngi jarııalanǵany habarlanǵan bolatyn.
