AQSh-ta lańkestik áreketke baılanysty birneshe adam ustaldy
ASTANA. Mamyrdyń 5-i. QazAqparat - AQSh-ta júzege asyrylmaı qalǵan lańkestik áreketke qatysy bar degen kúdikpen seısenbi kúni Karachıde birneshe adam ustaldy, olar dúısenbi kúni tutqyndalǵan bas kúdikti Faısal Shahzadtyń jaqyn týystary.
Brıtandyq telearnalardyń habarlaýynsha, bul týraly Pákistannyń qaýipsizdik qyzmetiniń ókili málim etti.
Al shyqqan tegi pákistandyq bolyp tabylatyn jáne Konnektıkýt shtatynda Brıdjport qalasynda turatyn amerıkan azamaty 30 jastaǵy Shahzadtyń ózi, quqyq qorǵaý organdarynyń deregi boıynsha, jaqynda 5 aı Pákistanda bolyp kelgen. Pákistannyń Kashmır bóliginde týyp ósken ol, Pákistannyń soltústik-batysyndaǵy Kohýt qalasynda sodyrlar lagerininiń birinde daıyndyqtan ótken. Atalmysh aýmaq aımaqtaǵy pákistandyq tálibterdiń jetekshileriniń biri Tarık Afrıdıdiń baqylaýynda.
Polıtsııa qoldan jasalǵan bomba qoıylǵan kólikti zalalsyzdandyrǵannan birneshe saǵattan keıin, «Pákistandyq Talıban» toby Internette málimdeme jasap, Nıý-Iorkta júzege aspaı qalǵan lańkestik úshin jaýapkershilikti óz moınyna aldy. Olar Taıms-skverde jarylmaı qalǵan bombany óz jetekshileriniń qazasy úshin kek alý maqsatynda qoıylǵanyn málim etken.
Al Federaldyq tekserý bıýrosy men Pákistannyń qaýipsizdik kúshteriniń ókilderi Taıms-skverdegi oqıǵaǵa «Pákistandyq Talıbannyń» qatysy týraly aqparatty teriske shyǵaryp otyr.
AQSh Bas prokýrory Erık Holderdiń aıtýynsha, Shahzad Dýbaıǵa attanǵaly turǵan ushaqqa minbek bolǵan jerinde Kennedı atyndaǵy Nıý-Iork áýejaıynda tutqyndalǵan.
