AQSh-ta qyzdarǵa jónsiz tıisti dep aıyp taǵylǵan Qazaqstan azamaty kepilge aqsha berip, kelesi tyńdaýǵa deıin bosatyldy
ASTANA. Qyrkúıektiń 6-sy. QazAqparat /Ernur Aqanbaı/ - AQSh-ta kámelettik jasqa tolmaǵan qyzdarǵa jónsiz tıisti dep aıyp taǵylǵan Qazaqstan azamaty Jandos Baqytbekuly kepilge aqsha berip, kelesi tyńdaýǵa deıin bosatyldy.
Bul týraly búgin elordada ótken baspasóz máslıhaty barysynda QR Syrtqy ister mınıstrliginiń baspasóz hatshysy Іlııas Omarov málim etti.
І. Omarovtyń aıtýynsha, aǵymdaǵy jylǵy qyrkúıektiń 2-de atalmysh is boıynsha birinshi tyńdaý ótken jáne aıyp taǵylyp otyrǵan Qazaqstan azamaty quny 1,5 myń AQSh dollary bolatyn qarjyny kepildikke berip, ázirge bosatylǵan. Endi ol qyrkúıektiń 30-y kúni bolatyn istiń kelesi tyńdaýyn kútetin bolady.
Budan buryn habarlaǵanymyzdaı J.Baqytbekuly AQSh-ta 11 jastaǵy eki qyz balaǵa jónsiz tıisti degen aıyppen tutqyndalǵan bolatyn. QR Syrtqy ister mınıstrliginiń málimetinshe, 20 jastaǵy Jandos Baqytbekuly Nıý-Iork shtatynyń Leık Djordj qalasynda Magic Forest (Sıqyrly orman) attraktsıonynda ustalǵan. «Atalǵan azamat shamamen 1,5 aı buryn Work and Travel ınternet-baǵdarlamasy jelisi boıynsha AQSh-qa attanǵan. Qazirgi ýaqytta bul másele Nıý-Iorktegi bas konsýldyqtyń baqylaýyna alyndy. Ustalǵan azamat kinásiniń bir bóligin moıyndady, endi kelesi tyńdaýdy kútemiz», degen bolatyn QR SІM baspasóz hatshysy qyrkúıektiń 1-gi brıfıngte.
