AQSh-ta kúshti qarly boran saldarynan qaza tapqandar 30-ǵa jýyqtady

ASTANA. QazAqparat - AQSh-ta «Elıot» qarly daýylynyń saldarynan 30-ǵa jýyq adam qaza tapty, ondaǵan adam zardap shekti, dep habarlaıdy QazAqparat Euronews arnasyna silteme jasap.

Jeksenbi kúni 200 myńnan astam tutynýshy jaryqsyz qaldy. Bir kún buryn myńdaǵan ishki jáne halyqaralyq reıster toqtatyldy nemese keıinge qaldyryldy. Nıý-Iork shtatyndaǵy Býffalo-Nıagara halyqaralyq áýejaıy jabyldy. Nıý-Iork pen qala mańyndaǵy turǵyndardan gaz tutynýdy azaıtý suraldy.

Kóptegen shtattarda temperatýra rekordtyq deńgeıge deıin tómendedi. Aýa raıynyń qolaısyzdyǵy týraly eskertýlermen el halqynyń úshten ekisi qamtyldy.

«Baqylaýlar tarıhynda mundaı sýyq pen aıaz AQSh-ta alǵash ret tirkelip otyr», - dep habarlaıdy Ulttyq aýa raıy qyzmeti.

Keıbir aýdandarda termometrler mınýs 45 gradýsqa deıin tómendegen. Birqatar shtattar tótenshe jaǵdaı jarııalady.

Kúshti qarly daýyl Kanadadan Tehasqa deıingi aýmaqty qamtydy, salqyn jel, qatty jańbyr men aıazdy el halqyn ábigerge túsirdi.

Buǵan deıin AQSh-ta qarly boran saldarynan 23 adamnyń qaza tapqany habarlanǵan. Munda sońǵy 40 jyldaǵy eń sýyq Rojdestvo bolady dep kútilýde.