AQSh-ta kúshikke talasqan jasóspirim 8 jasar kórshi qyzdy atyp tastady
ASTANA. QazAqparat - AQSh-tyń Djefferson (Tennessı shtaty) okrýginiń soty besinshi synyp oqýshysyna qatysty úkimdi jarııa etti, ol segiz jasar kórshi qyzdy atyp óltirgen, dep jazady sheteldik BAQ.
Qaıǵyly oqıǵa 2015 jyly 3 qazanynda Ýaıt Paın qalashyǵynda oryn alǵan. Sol kúni úsh kishkentaı qyz aýlada kúshikpen oınap otyrǵan. Olarǵa jatyn bólme terezesiniń aldynda otyrǵan 11 jasar kórshi bala qyzyǵyp qaraǵan. Bala kúshikti kórsetýin suraǵanda qyzdar bas tartady.
«Joq» degen jaýapty estigen ol úıden ákesiniń myltyǵy men tapanshasyn alyp shyǵady. Bermegen jaǵdaıda atyp tastaıtynyn aıtady. Biraq qyzdar oǵan senbeı, kúlgen. Kúlkige qalǵan jasóspirim segiz jasar Maıkaıla Daıer esimdi qyzdy atyp, keýdesinen tıgizgen. Qyz bala birer mınýttan keıin anasynyń qolynda jan tapsyrdy.
«Adam óltirgen bala bostandyqta júre almaıdy», - dedi úkimdi oqyǵan sýdıa Dennıs Roých.
Amerıkanyń WATE-TV telearnasynyń habarlaýynsha, jasóspirim 19 jasqa tolǵansha kámelettik jasqa jetpegenderge arnalǵan túzeý mekemesinde bolady.
