AQSh-ta qupııa aqparattyń taralýyna baılanysty general qyzmetinen ketti
ASTANA. KAZINFORM — AQSh qorǵanys mınıstri Pıt Hegset Iran soǵysy týraly qupııa aqparattyń taralýyna qatysty generaldy qyzmetinen shettetti, dep habarlaıdy Kazinform agenttiginiń Vashıngtondaǵy menshikti tilshisi New York Post basylymyna silteme jasap.
AQSh armııasynyń general-leıtenant Brett Sılvıı Birikken shtab bastyqtary komıtetinde strategııa, josparlaý jáne saıasat jónindegi dırektor qyzmetin atqardy jáne Iranmen segiz aılyq qaqtyǵystyń basynan aıaǵyna deıin jetekshi áskerı strateg boldy.
Qorǵanys mınıstrliginiń ókili Sılvııdi «mınıstr Hegset aýyr tártip buzǵany úshin qyzmetinen bosatqanyn» aıtty.
— Sılvıı Iran soǵysy jáne basqa da máseleler týraly qupııa aqparattyń taralýyna qatysty tergeýdiń fıgýranty bolyp otyr. Pentagonnyń ǵımaratqa kirgen jýrnalısterdi ertip júrýdi talap etetin BAQ saıasatyna baılanysty, Sılvıı qupııa aqparattardy bólisý úshin jýrnalıstermen Pentagonnyń syrtynda kezdese bastady, — dedi mınıstrlik ókili.
Sheneýniktiń aıtýynsha, general tekseristen ótpegen.
— Sılvıı qupııa aqparatty jarııa etýge qatysty suraqtar qoıylǵan úsh polıgrafııalyq synaqtan ótpedi. Oǵan qatysty tergep-tekserý júrip jatyr, is kelesi sharalardy qabyldaý úshin AQSh Ádilet mınıstrligine joldandy.Qupııa aqparattyń taralýynyń saldary aýyr bolǵandyqtan, mınıstr Hegset ulttyq qaýipsizdikti qorǵaý úshin dereý arada shara qoldanyp, Sılvııdi jumystan shyǵardy. Shuǵyl sharalar qajet boldy jáne ony bir sekýndqa da keshiktirýge bolmas edi, — dedi ol.
Pentagonnyń resmı ókili Shon Parnell X áleýmettik jelisine qupııa aqparatty taratý áskerdiń ómirin qaterge tigetinin jazdy.
— Qorǵanys mınıstrligi qupııa aqparattyń tıisti ruqsatsyz ádeıi jarııa etilýine jol bermeıdi. Ulttyq qaýipsizdik týraly qupııa aqparatty jarııalaǵan kez kelgen adam bizdiń sarbazdarymyzdyń ómirin qaýip-qaterge tigedi jáne ultymyzdyń qaýipsizdigin qamtamasyz etýge baǵyttalǵan barlyq áskerı operatsııalarǵa nuqsan keltiredi, — dep jazdy Parnell.
Alaıda, Birikken shtab bastyqtary komıtetiniń ókili Sılvııdi maqtap, komıtet tóraǵasy, Birikken shtab bastyqtary komıteti jáne Birikken kúshter «general-leıtenant Brett Sılvıı men onyń otbasyna 32 jyl boıy elge sińirgen adal eńbegi úshin tereń rızashylyq bildiretinin» jáne basshylyq «oǵan jáne onyń otbasyna amandyq tileıtinin» jetkizdi.
Eske salaıyq, AQSh-tyń qarý-jaraq qorlary týraly qupııa aqparattyń taralýyna baılanysty Pentagonda aýqymdy tekseris júrgizildi.
AQSh Qorǵanys mınıstrligine qarasty kadrlyq derekter bazasyna jasalǵan kıbershabýyl saldarynan 3 mıllıonǵa jýyq adamnyń jeke málimetteri ashylyp qaldy.
AQSh-tyń Iranmen soǵysqa jumsaǵan shyǵyny 47 mlrd dollardan asqany habarlanǵan.
