AQSh-ta quny 1 mln dollarǵa jýyq pokemon kartalary urlandy
ASTANA. KAZINFORM — Ońtústik Kalıfornııada baǵaly zattardyń túpnusqalyǵyn tekserip, qunyn baǵalaıtyn kompanııanyń janynda turǵan FedEx júk kóliginen quny 1 mıllıon dollarǵa jýyq sırek kezdesetin pokemon kartalary urlandy, dep habarlaıdy Kazinform agenttiginiń Vashıngtondaǵy menshikti tilshisi ABC News-ke silteme jasap.
Oqıǵa Santa-Ana qalasyndaǵy Professional Sports Authenticator (PSA) keńsesiniń mańynda bolǵan. Polıtsııanyń málimetinshe, urlanǵan júzdegen kartanyń jalpy quny — 963 myń dollar.
Qoldy bolǵan kartalar AQSh-tyń ár óńirinen kelgen kollektsıonerlerge tıesili bolǵan. Olar kartalardy túpnusqalyǵyn tekserip, naryqtyq qunyn anyqtaý úshin PSA kompanııasyna tapsyrǵan.
Osyǵan baılanysty Sky-B Cards laqap atymen tanymal kollektsıonerdiń eki jyl boıy jınaǵan 104 kartasy da urlanǵan. Ol kartalardy baǵalatý úshin PSA kompanııasyna 8 myń dollardan astam qarajat jumsaǵan. Jınaǵy 150 myń dollardan astam somaǵa saqtandyrylǵan.
Kúdiktiler áli anylǵan joq, polıtsııa tergeý júrgizip jatyr.
Buǵan deıin Pokemon kartasy Nıý-Djersıdegi aýktsıonda rekordtyq 16,49 mıllıon dollarǵa satylǵany habarlaǵanbyz.
