AQSh-ta kúdikti qylmys ornyna oralyp, jýrnalısterge oq jaýdyrdy
ORLANDO. QazAqparat – AQSh-ta qylmysker adam óltirgen jerge qaıta oralyp, reportaj jasap jatqan jýrnalısti atyp óltirdi. Keıin jaqyn mańdaǵy úıge kirip, anasy men qyzyna oq atty, dep habarlaıdy QazAqparat CNN-ge silteme jasap.
Oqıǵa Florıda shtatynyń Orlando qalasynda bolǵan. Jergilikti Spectrum News 13 telearnasynyń eki jýrnalısi óz kóliginde óltirilgen 20 jastaǵy áıel týraly reportaj jasap jatqan kezde kúdikti oqıǵa ornyna qaıta oralǵan. Ol tilshilerge oqý jaýdyryp, birin mert qylǵan.
Qarýlanǵan kúdikti – 19 jastaǵy bozbala.
Orındj okrýginiń sherıfi Djon Mına baspasóz konferentsııasynda málim etkendeı, jýrnalısterge shabýyl jasaǵannan keıin kúdikti – Kıt Mozes kórshi úıge kirip qyzy men anasyna oq atqan. Qyzdyń anasy – aýrýhanada, jaǵdaıy – aýyr. Ekinshi telejýrnalıst te jaraly.
Sherıftiń aıtýynsha, kúdikti buǵan deıin de birneshe qylmys jasaǵan. Atap aıtqanda, buryn atys qarýyn paıdalanǵany, óte aýyr hálge jetkizip uryp-soqqany, qarýmen shabýyl jasaǵany, basa kóktep kirip urlyq jasaǵany, iri kólemde urlyq qylǵany úshin aıyptalǵan bolatyn.
Polıtsııa dereginshe, shabýyl jasaǵan adam alǵashqy qurbany – 20 jastaǵy qyzben tanys bolǵan. Alaıda reporterlerge de, toǵyz jasar qyz ben onyń anasyna da qatysy bolmaǵan. Ázirge onyń kórshi úıge nelikten kirgeni belgisiz.
Foto: edition.cnn.com
