AQSh-ta koronavırýstan 100 myńnan astam adam qaıtys bolýy múmkin

VAShINGTON. QazAqparat – Jeksenbi kúni AQSh Ulttyq allergııalyq jáne juqpaly aýrýlar ınstıtýtynyń dırektory Entonı Faýchı jańa koronavırýstan 100 myńnan 200 myń adamǵa deıin qurban bolýy múmkin ekenin málim etti.

Vırýstan 2000-nan astam amerıkalyq qaıtys bolǵan, dep habarlaıdy QazAqparat CNN -ge silteme jasap.

Sondaı-aq, ol mıllıondaǵan adamnyń koronavırýs juqtyrýy múmkin ekenin atap ótti.

Eki kúnniń ishinde qaıtys bolǵandar sany eki esege artyp, 2 myń adamǵa jetken. Senbi kúni tańerteńgi jaǵdaı boıynsha, AQSh-ta 121 myń adam aýrý juqtyrǵan.

Jeksenbi kúni prezıdent Donald Tramp baspasóz máslıhatynda málim etkendeı, AQSh-ta koronavırýstan qaıtys bolǵandar sany 100 myń-200 myń adamǵa jetse, ákimshilik «jaqsy jumys istedi» dep aıtýǵa bolady.

Aýrý juqtyrǵandar sanynyń kún sanap artyp jatqanyna baılanysty aýrýhanalarda oryn tapshy, ásirese Nıý-Iorkte – shtatta elde aýrý juqtyrǵandar eń kóp tirkelgen.

Eldegi kóptegen aýrýhanalarda eki aptadan keıin oryn bolmaıdy, sebebi aýrý juqtyrǵandar sany ósip jatyr, dep málimdedi Tramp.

Vırýstyń taralýyn toqtatý masatynda túrli qalalar men shtattarda, sonyń ishinde Nıý-Iorkte bılik turǵyndardyń úıde qalýyn mindetteıtin sheshim shyǵarǵan. Bul sheshim 215 mln amerıkalyqqa qatysty bolyp otyr.

Johns Hopkins University málimetinshe, AQSh-ta jeksenbi kúngi derek boıynsha aýrý juqtyrǵandar sany 142 myń adamǵa jetti. COVID-19 shaldyqqandar sany álemde 722 myń adam, odan 34 myń adam kóz jumdy.