AQSh-ta koronavırýsqa shaldyqqandar sany Qytaıdan asyp tústi
VAShINGTON. QazAqparat – AQSh koronavırýs juqtyrǵan adamdardyń sany boıynsha Qytaıdan ozdy. Beısenbi kúngi málimetter boıynsha, AQSh-ta indetke shaldyǵýdyń 82040 jaǵdaıy tirkeldi. Qytaıda naýqastanǵandardyń jalpy sany 81782 bolǵan edi, dep habarlaıdy QazAqparat VVS agenttigine silteme jasap.
AQSh prezıdenti Donald Tramptyń aıtýynsha, eldiń koronavırýs juqtyrý oqıǵalary boıynsha birinshi orynǵa shyǵýy adamdarǵa testileýdiń jappaı ótkizilýimen baılanysty. Nıý-Iorktiń ózinde ǵana aýrý juqtyrǵan 30 myńnan astam adam bar. Budan nashar statıstıka tek Italııada ǵana. Іndet juqtyrý oqıǵalary Amerıkanyń barlyq 50 shtatynda tirkelgen, odan kóz jumǵandar sany 1000 adamǵa jetti.
Buǵan deıin AQSh Senaty el ekonomıkasyn qoldaý úshin eki trıllıon dollar bólý týraly zań jobasyn qabyldaǵan. Bul Amerıka tarıhynda úkimet kórsetip otyrǵan eń kólemdi paket – AQSh-tyń árbir eresek turǵyny 1200 dollar kóleminde birjolǵy kómek alatyny shamalanǵan. Budan bólek, shaǵyn kompanııalarǵa jalaqy tóleýdi qamtamasyz etýge múmkindik beretin qarjylyq demeý kórsetý qarastyrylǵan.
AQSh-ta koronavırýs indeti órshigennen keıin jumyssyz adamdardyń sany artyp, rekordty 3,3 mıllıonǵa jetti.
