AQSh-ta kópfýnktsııaly NEO turmystyq robotyna aldyn ala tapsyrys berý bastaldy

ASTANA. KAZINFORM — Amerıkalyq 1X kompanııasy NEO atty álemdegi alǵashqy turmystyq gýmanoıd robotyna aldyn ala tapsyrys qabyldaýdyń bastalǵanyn jarııalady, dep jazdy Kazinform agenttiginiń menshikti tilshisi Businesswire-ge silteme jasap.

Robot úı jınaý, kirlerdi retteý, keńistikti rettesttirý, tipti tamaq ázirleýge qolǵabys etý sııaqty túrli turmystyq isterdi avtomatty túrde oryndaı alady.

NEO jasandy ıntellekt júıesimen jabdyqtalǵan. Bul júıe robotqa ıesimen tabıǵı áńgime júrgizýge, komandalardy tanýǵa, aınalasyn saraptaýǵa jáne otbasy qajettilikterine beıimdelýge múmkindik beredi. Sondaı-aq ol buryn berilgen komandalardy este saqtaıdy, satyp alý tizimderin jasaıdy, mańyzdy oqıǵalar týraly eskertedi jáne oqýǵa járdemdesedi.

Robottyń apparattyq platformasy jumsaq ári qaýipsiz qozǵalysty, joǵary kóterý jáne tasymaldaý qabiletin, sondaı-aq tómen shý deńgeıin qamtamasyz etedi.

NEO robottarynyń alǵashqy jetkizilimi AQSh-ta 2026 jylǵa josparlanǵan. Al 2027 jyly ónimniń halyqaralyq naryqqa shyǵýy kózdelip otyr. Aldyn ala qoljetimdilik baǵasy — 20 myń AQSh dollary, al aılyq jazylym quny 499 dollardy quraıdy.

1X kompanııasynyń málimdeýinshe, jobanyń basty maqsaty — adamdardyń kúndelikti ómirin jaıly ári qaýipsiz etý, turmystyq mindetterdi jeńildetip, ómir sapasyn arttyrýǵa qabiletti ıntellektýaldy robottardy usyný.

Buǵan deıin Tesla kompanııasynyń basshysy Ilon Mask aldaǵy jyldary adam tárizdes Optimus robottarynyń «armııasyn» qalyptastyryp, jyl saıyn shamamen 1 mıllıon dana óndirýdi josparlap otyrǵanyn habarlaǵan edi.

Gýmanoıd robottar bolashaqta adamdardy almastyrady.

Ilon Mask JI 2030 jylǵa qaraı adam ıntellektisinen asyp túsetinin aıtty.