AQSh-ta qoltyraýyn balyqshyny sý astyna tartyp áketti
ASTANA. KAZINFORM — AQSh-tyń Florıda shtatyndaǵy Ýınter-Garden qalasynda qoltyraýyn balyqshyǵa shabýyl jasap, ony sý astyna tartyp áketken. Uzyndyǵy shamamen 3,6 metr bolatyn baýyrymen jorǵalaýshy 71 jastaǵy qarııa Stıvenniń ómirin qıdy. Bul — Florıdada bıyl bolǵan osyndaı ekinshi oqıǵa, dep habarlaıdy BILD.
Kýágerlerdiń aıtýynsha, Stıven Apopka kólinde qarmaǵyna túsken balyqty jaǵaǵa shyǵaryp, janyndaǵy seriginen oljasymen birge sýretke túsirýdi suraǵan. Sol sátte sýdan qoltyraýyn shyǵyp, onyń aıaǵynan tistep, súırep áketken.
Arada biraz ýaqyt ótken soń qoltyraýyn zeınetkerdi qaıtadan sý betine shyǵarǵanymen, ony jibermegen. Tergeýshilerdiń boljaýynsha, sońynda balyqshy sýǵa batyp ketken.
Ýınter-Garden polıtsııasynyń habarlaýynsha, sý aıdynynda qoltyraýyndar kóp bolǵandyqtan, qutqarýshylar oqıǵaǵa birden aralasa almaǵan. Órt sóndirý qyzmetiniń basshysy Hose Gaınsanyń aıtýynsha, er adamnyń denesi sýdan shamamen eki saǵattan keıin shyǵarylǵan.
Tabıǵatty qorǵaý ınspektorlary allıgatordy óltirdi
Polıtsııa Florıda shtatynyń balyq jáne jabaıy tabıǵatty qorǵaý komıssııasymen birlesip, oqıǵany tergeýge kiristi. Budan bólek, jabaıy tabıǵatty qorǵaý ınspektorlary shabýylǵa qatysy bar dep boljanǵan qoltyraýyndy ustap alǵan.
Áýeden túsirilgen kadrlarda 6 adamnyń alyp baýyrymen jorǵalaýshyny sýdan shyǵaryp, jaǵaǵa súırep jatqany kórinedi. Inspektorlar onyń aýzyn baılap, janýardy óltirgen.
Florıda shtatynyń derekterine sáıkes, 1948 jyldan beri qoltyraýyndardyń shabýylynan barlyǵy 34 adam qaza tapqan. Olardyń ekeýi 2026 jyly kóz jumǵan.
2025 jyly qoltyraýyn 61 jastaǵy áıel otyrǵan kanoeni aýdaryp jibergen. Al 2023 jyly qoltyraýyn ıtin serýendetýge shyqpaq bolǵan 85 jastaǵy áıeldi óz baqshasynan sýǵa súırep áketken.
Aıta keteıik, Aýstralııada qoltyraýyndar mekendeıtin ózende Olımpıada jarystary ótedi.
Buǵan deıin Aýstralııa polıtsııasy sý tasqynynan keıin elde qoltyraýyndar kóbeıgenin aıtyp, turǵyndarǵa eskertý jasady.
