AQSh-ta klýbta oq jaýdyryp, 5 adamdy óltirgen qylmysker 190 jylǵa sottaldy

ASTANA. KAZINFORM — Ózin «bınarly emes» adamdar sanatyna jatqyzatyn jas jigit osydan eki jyl buryn Kolorado shtatynda LGBT klýbyna kelýshilerdi atyp óltirgen edi. Ol seısenbide 55 ómir boıyna bas bostandyǵynan aıyrý jazasyna kesilip, 190 jylǵa sottaldy, dep jazady VVS.

Osylaısha 24 jastaǵy Anderson Oldrıch polıtsııamen kelisimge kelip, ondaǵan pýnkt boıynsha kinásin moıyndady jáne bul oǵan ólim jazasynan qutylýǵa múmkindik berdi.

Seısenbide úkim jarııalanǵan federaldy is bolatyn, al shtat deńgeıindegi is boıynsha Oldrıch ótken jyly taǵy da osylaı tergeýmen kelisim jasap, bes ómir boıyna bas bostandyǵynan aıyrý jazasyn alǵan. 

Sýdıa Sharlotta Sýını úkimdi jarııalaı otyryp Anderson Oldrıchtiń klýbqa kelýshilerge «jynystyq orıentatsııasyna» baılanysty oq jaýdyrǵanyn moıyndaǵanyn eske saldy.

Anderson Oldrıchtiń advokattarynyń aıtýynsha, ol ózin «bınarly emes» (adamdardyń qos jynysqa qatań bólinýin joqqa shyǵaratyn) tulǵa sanaıdy jáne ózin qazirgi aǵylshyn tilinde adamnyń jynysy belgisiz bolǵan kezde qoldanylatyn «olar» esimdigimen ataǵandy jón kóredi.

Oldrıchtiń ózi Kolorado-Sprıngs qalasyndaǵy Q klýbynda birneshe ret bolǵan, al 2022 jyldyń 19 qarashasynda bes adamdy atyp óltirip, taǵy 19 adamdy jaraqattady.

Ony polıtsııa kelgenge deıin osy klýb qonaǵy, burynǵy áskerı Rıchard Fıerro jáne oǵan kómekke kelgen taǵy eki adam toqtatyp úlgerdi. 

Sotta prokýrorlar Oldrıchtiń buǵan deıin LGBT qaýymdastyǵyndaǵy adamdar men polıtsııa jaıynda jekkórinishpen aıtqanyn jetkizdi.