AQSh-ta qyzylsha juqtyrý deregi sońǵy 33 jyldaǵy eń joǵary deńgeıge jetti

ASTANA. KAZINFORM — AQSh-ta bıylǵy jyly qyzylshaǵa shaldyǵý jaǵdaılary 1 288-ge jetip, bul sońǵy 33 jyl ishindegi eń joǵary kórsetkish boldy. Bul týraly Kazinform tilshisi CBS News-ke silteme jasap habarlady.

Bıylǵy jyl AQSh-ta qyzylsha boıynsha eń aýyr jyl boldy — sońǵy ret mundaı jaǵdaı 1992 jyly tirkelgen, sol kezde 2 126 jaǵdaı rastalǵan. Elde bul vırýs resmı túrde 2000 jyly joıylǵan dep jarııalanǵan. Vaktsınatsııanyń joǵary deńgeıiniń arqasynda vırýstyń taralýy toqtatylǵan bolatyn.

– Qyzylshaǵa shaldyǵý qaýpi vaktsınatsııa deńgeıi tómen, belsendi indet oshaǵy bar nemese osyndaı oshaqtarmen áleýmettik jáne/nemese geografııalyq turǵyda tyǵyz baılanysty eldi mekenderde joǵary, — delingen AQSh-tyń Aýrýlardy baqylaý jáne aldyn alý ortalyǵynyń (CDC) málimdemesinde.

Qyzylshaǵa shaldyǵý 38 shtatta rastaldy. Eń kóp juqtyrý jaǵdaılary Tehas shtatyndaǵy indetpen baılanysty. Bul jerde 750-den astam jaǵdaı tirkelip, eki bala ajal qushty. 

Іndet alǵashynda vaktsınatsııa deńgeıi tómen aýyldyq qaýymdastyqta bastalǵan. Densaýlyq saqtaý organdarynyń málimetinshe, qaıtys bolǵan alǵashqy naýqas — mektep jasyndaǵy ekpe almaǵan bala, al ekinshi jaǵdaıda — segiz jastaǵy ekpe almaǵan qyzdyń ólimi rastaldy. Eki balanyń da burynnan kele jatqan aýrýlary bolmaǵan.

Aıta keteıik, AQSh-ta 2025 jyly qyzylshaǵa shaldyqqandar men osy aýrýdan qaıtys bolǵandar sany aldyńǵy jyldardaǵy kórsetkishterden asyp tústi.

AQSh-tyń Aýrýlardy baqylaý jáne aldyn alý ortalyǵynyń (CDC) 3 sáýirdegi málimeti boıynsha bir aptada el boıynsha 124 jańa jaǵdaı tirkelip, qyzylshanyń jyl basynan bergi jalpy sany 607-ge jetken.

Buǵan deıin habarlanǵandaı, Qyrǵyzstanda da qyzylsha órship tur, jyl basynan beri toǵyz bala qaıtys bolǵan.