AQSh-ta qyzdyń ólimi týraly podkast polıtsııaǵa 44 jyldan keıin qylmyskerlerdi tabýǵa kómektesti
ASTANA. KAZINFORM — Lýızıanada tergeýshiler 16 jasar qyzdyń ólimin 44 jyldan keıin ashty. Mańyzdy ról atqarǵan podkast isti qaıtadan nazarǵa alyp, jańa kýálikter alýǵa kómektesti, dep habarlaıdy Associated Press.
1982 jyly Roksanna Sharptyń denesi Sent-Tammanı ormannan tabyldy. Bul oryn Nıý-Orleannan shamamen 50 shaqyrym jerde ornalasqan. Dálelderdiń jetkiliksizdiginen uzaq ýaqyt boıy tergeý nátıjesiz boldy. Keıin polıtsııa jergilikti medıa-kompanııa Northshore Media-ǵa podkast túsirý týraly usynysyn bildirdi. Alty serııaly «Roksanna Sharpty kim óltirdi?» podkasty ótken jyly jaryq kórdi jáne qoǵamda úlken rezonans týdyrdy.
— Podkast bizdiń tergeýshilerge Roksannanyń ólim aldyndaǵy birneshe kúnde qaıda bolǵanyn jáne onyń qaı jerde qaza tapqanyn anyqtaýǵa kómektesti. Bul aqparattan soń kýágerler bizben baılanysqa shyǵa bastady, — dedi polıtsııa ókili Mark Gremııon.
Northshore Media kompanııasynyń vıtse-prezıdenti Charlz Daýdı, bastapqyda kórermenderdiń eski iske qyzyǵýshylyq tanytýyna kúmándanǵanyn moıyndady.
— Podkastty bastaǵanda, bul iske eshkimniń kóńili tolmaıtyn sııaqty boldy. Baǵdarlamadan soń, biraz adam keri baılanys ornatyp, Roksannany bilgenin, áli kúnge esinde ekenin jáne dostyqtary týraly aıtty, — dedi ol.
Onyń aıtýynsha, tergeýshiler istiń barysyn qaıta qalpyna keltire otyryp, qylmys jaǵdaılaryn anyqtaǵan. Aýdıojazbada qyzdy kóshede ustap, kúshpen ormanǵa alyp ketkeni aıtylǵan.
Osy aptada polıtsııa osy iske qatysty 4 er adamdy ustady, olardy zorlaý jáne ekinshi dárejedegi kisi óltirý boıynsha aıyptap otyr. Bul Perrı Ýeın Teılor (64 jas), Darrell Dın Spell (64 jas), Karlos Kýper (64 jas) jáne Bıllı kishi-Ýılıams (62 jas). Olardyń barlyǵy marqummen tanys bolǵan. Kýper men Teılor ustalǵan kezde olar basqa qylmystary boıynsha túrmede otyrǵan.
Bir aıyptalýshynyń uly, Bıllı Ýılıams, ákesiniń kinásiz ekenin málimdedi.
— Ákesi ózine taǵylǵan aıyptardy moıyndamaıdy. Ol eshkimge eshqashan zııan keltirmegenin aıtady, — dep aıtty ol.
Tergeý uzaq ýaqyt boıy jalǵan izben júrgizilgen: serııalyq kisi óltirýshi Genrı Lýkas Sharpty óltirgenin moıyndaǵan, biraq keıin óz sózinen bas tartqan, al dálelder onyń aıybyn rastaǵan joq.
Marqumnyń jıeni Mıkel Lappen otbasy atynan, istiń ashylýyna kómektesken barlyq adamǵa alǵys bildirdi.
— Bizdiń otbasymyz ben Roksannany jaqsy kórgender jáne búkil qaýymdastyq úshin ádilettilikpen birge tynyshtyq keledi dep úmittenemiz, — dedi ol óziniń málimdemesinde.
Bul oqıǵa podkasttardyń tergeýlerge jáne qoǵamdyq pikirdi qalyptastyrýǵa qanshalyqty áser etýi múmkin ekendigin kórsetedi. Tehnologııa men aqparattyń jańa túrleri qylmystardy ashýda mańyzdy ról atqarady.
Aıta keteıik, Aqmolada qyzdy zorlap, óltirgen qylmysker 24 jyldan keıin jazasyn aldy.
