AQSh-ta qazaqstandyq genetık-ǵalymnyń jańalyǵyn álemdik ǵylymı qaýymdastyq qyzý talqylap jatyr
ASTANA. QazAqparat - AQSh-ta qazaq ǵalymy Shýhrat Mútálipov balany úsh ata-anadan týdyryp alýǵa bolatyn tehnologııany oılap tapty.
Qazirgi ýaqytta bala týýǵa qatysty jańa tehnologııanyń qaýipsizdigin FDA (AQSh-tyń azyq-túlik jáne dári-dármek sapasyn sanıtarlyq qadaǵalaý basqarmasy) tekserip jatyr. Áńgime balany úsh ata-anadan týdyryp alýǵa bolatyn jańalyqqa qatysty bolyp otyr.
AQSh jáne Qytaı ǵalymdary zertteýge alǵan jańa ádis genetıkalyq aýrýlary bar analarǵa deni saý bala tabýǵa múmkindik bermek.
Bul tehnologııa boıynsha áıelden analyq jasýshasy alynyp, ol jerden ózgeristerge ushyraǵan kemis DNQ shyǵarylady. Sosyn onyń ornyna deni saý áıeldiń analyq jasýshasynan alynǵan ıadro salynady. Keıin oǵan erkek uryǵy engizilip, anasynyń jatyryna ornalastyrylady.
Osyndaı ádiste balaǵa donor bolǵan áıeldiń tek 0,1 paıyz geni beriledi. Degenmen, ol balada eki emes, úsh ata-ana bar dep esepteýge bolady.
Jańa teorııa Reproductive BioMedicine Online atty ǵylymı jýrnalda jarııalandy. Onyń avtory - Qazaqstan týmasy Shýhrat Mútálipov. Joǵary bilimdi ol Reseıde alǵan. Qazirgi ýaqytta Sh.Mútálipov Oregonanyń ǵylym jáne densaýlyq ýnıversıtetiniń (Oregon Health and Science University) professory bolyp tabylady.
FDA bul tehnologııany 25 aqpanda zertteı bastady. Bir aptadan keıin AQSh bıligi úsh ata-anadan bala tabýǵa bolatynyn, ne bolmaıtynyn sheshýi tıis.
