AQSh-ta qazaqstandyq fılm 3 nomınatsııa boıynsha úzdik atandy
ASTANA. QazAqparat -Los-Andjeleste ótken «Genrecelebration 2018» janrlyq kıno halyqaralyq festıvalinde qazaqstandyq rejısser Nurtas Adambaıdyń «Lıft» fılmi úsh birdeı nomınatsııa boıynsha úzdik atandy, dep habarlaıdy QazAqparat tilshisi.
«Bizdiń «Lıft» fılmimiz Los-Andjeleste (AQSh) jyl saıyn ótetin «Genrecelebration 2018» janrlyq kıno festıvalinde 3 birdeı «Úzdik dramalyq fılm», «Úzdik rejıssýra» jáne «Úzdik operatorlyq jumys» nomınatsııalary boıynsha syılyq ıegeri atandy. Sondaı-aq, «Úzdik montaj» nomınatsııasy boıynsha da syılyq alýymyzǵa bolady. Bul festıvalde osydan 2 jyl buryn «Taraz» fılmi jeńiske jetken bolatyn», - dedi «Lıft» fılminiń rejısseri Nurtas Adambaı Feısbýk paraqshasynda.
Sonymen qatar, ol festıval uıymdastyrýshylarynyń atalǵan fılmdi Amazon arqyly taratý men satý boıynsha kómek usynǵanyn aıtty.
Aıta keteıik, Nurtas Adambaıdyń «Lıft» fılmi otandyq prokatqa ústimizdegi jyldyń 11 qazanynan bastap shyqqan bolatyn. Psıhologııalyq trıller janryna jatatyn fılm sıýjetine kelsek, kezdeısoq 2 er adam bireýi kásipker, ekinshisi kúzetshi lıft ishinde qamalyp qalady da oqıǵa jelisi sonyń ishinde oryn alady. Týyndyda búgingi qoǵamnyń áleýmettik aspektileri kórsetilgen. Basty rólderdi Jandos Aıbasov pen Isbek Ábilmájinov somdaıdy.
Belgili rejısser Nurtas Adambaıdyń atalǵan fılmnen bólek, «Kelınka Sabına», «Pobeg ız aýla» (Aýyldan qashý) sekildi kópke tanymal týyndylary bar.
