AQSh-ta Qazaqstandaǵy áıel quqyǵynyń qorǵalýyna oń baǵa berildi

NUR-SULTAN. QazAqparat - AQSh-qa jumys saparynyń aıasynda Qazaqstandaǵy Adam quqyqtary jónindegi ýákil Elvıra Ázimova Memlekettik hatshy kómekshisiniń demokratııa, adam quqyqtary jáne eńbek jónindegi orynbasary Kara Makdonaldpen, Kongress ókilderimen kezdesti jáne adam quqyqtaryn qorǵaýmen aınalysatyn úkimettik emes uıymdarǵa arnalǵan brıfıng ótkizdi.

Bul týraly QR SІM baspasóz qyzmeti habarlaıdy.

Atalǵan kezdesýler barysynda elimizde adam quqyqtarynyń saqtalýyn qamtamasyz etý máseleleri, sondaı-aq Prezıdent Qasym-Jomart Toqaevtyń «Jańa Qazaqstan: jańarý men jańǵyrý joly» Qazaqstan halqyna Joldaýynyń tıisti qaǵıdalary men qańtar oqıǵalary boıynsha júrgizilip jatqan tergeýge toqtaldy. AQSh Memlekettik departamentinde ótken kezdesýde E. Ázimova K.Makdonaldty Adam quqyqtary jónindegi ulttyq ortalyqtyń jumysy týraly, sondaı-aq Prezıdenttiń Qazaqstan halqyna Joldaýynda kórsetilgen saıası reformalardyń aýqymdy baǵdarlamasy men áleýmettik-ekonomıkalyq sharalar týraly habardar etti. Keń aýqymdy demokratııalyq reformalar, sonyń ishinde saılaý júıesin jetildirý jáne t.b.

AQSh Kongresinde ótken kezdesýlerde E. Ázimova suhbattasýshylardyń nazaryn bıliktiń zań shyǵarýshy tarmaǵynyń ókilettikterin aıtarlyqtaı keńeıtýge jáne Qazaqstannyń partııalyq júıesin damytýǵa baǵyttalǵan jańa progressıvti sharalarǵa aýdardy.

Azamattyq qoǵam men AQSh Memlekettik departamenti ókilderiniń qatysýymen ótken dóńgelek ústelde Adam quqyqtary jónindegi ýákil qańtar oqıǵasy boıynsha júrgizilip jatqan tergeýdiń aldyn ala qorytyndylaryna toqtaldy. Ol Qazaqstan Prezıdentiniń adamnyń negizgi quqyqtaryn qorǵaý, onyń ishinde qamaýǵa alynǵandardyń quqyqtaryn qamtamasyz etý qaǵıdattaryn ustanatynyn atap ótti.

Sharaǵa Freedom House, National Endowment for Democracy, Solidarity Center, Halyqaralyq respýblıkalyq ınstıtýt, Helsınkı komıssııasy sııaqty ÚEU qyzmetkerleri qatysty. Sonymen qatar, brıfıngke quqyq qorǵaýshy, «Aqıqat» qoǵamdyq komıssııasynyń jetekshisi, 2018 jyly AQSh Memlekettik departamentiniń «Batyl áıelder» halyqaralyq syılyǵymen marapattalǵan Aıman Omarova qatysty. Ol óz sózinde ózi basqaratyn komıssııa júrgizgen tergeý jumystary men onyń nátıjelerine toqtaldy.

Jalpy, amerıkalyq seriktester Qazaqstandaǵy saıası reformalar men demokratııalyq ózgeristerge oń baǵa berdi. Úkimettik emes uıymdardyń ókilderi qazaqstandyq taraptyń ashyqtyǵyn quptap, dıalogtyń, sonyń ishinde vırtýaldy formatta da, jemisti jalǵasatynyna úmit artatyndaryn bildirdi.