AQSh-ta qazaq kınosynyń aptalyǵy ótip jatyr
Qazaqstannń respýblıka kúnine oraı birinshi Ortalyq Azııa kınofestıvali (Central Asian Film Festival) aıasynda AQSh-ta Qazaqstan kınosynyń aptalyǵy ótip jatyr, dep habarlaıdy Kazinform menshikti tilshisi.
Amerıkalyq kórermenge «Oqqaǵar» jáne «Masha men Dýdaraı» atty úzdik qazaqstandyq fılmder usynylady. Basty rólderdi qazaqstandyq akterler Táýekel Músilim, Erik Hamıdýllaev, Rústem Álmaǵambetov, Oljas Áljanov, Baýyrjan Satov jáne Aıbek Serikhanovtar somdaǵan.
Fılmderdiń tusaýkeseri jáne akterlermen kezdesý Vashıngtonnyń ortalyǵyndaǵy Dúnıejúzilik bank ǵımaratynda ótti.
Qazaqstan Respýblıkasynyń AQSh-taǵy Elshisi Erjan Ashyqbaev Vashıngtondaǵy mańyzdy mádenı sharaǵa qatysý ol úshin úlken qýanysh jáne qurmet ekenin atap ótti.
Uıymdastyrýshylar men akterlerge AQSh-taǵy qazaq kınosynyń tusaýkeseri úshin alǵysyn bildirip, jaqyn arada qazaqstandyq kıno juldyzdaryn Gollıvýdta kórý tilegin bildirdi.
Sondaı-aq, Elshi birneshe aı buryn Vashıngtonda «Paralımpıadashy» fılmi kórsetilgenin jáne Djordj Vashıngton ýnıversıtetiniń qazaq kınosy boıynsha amerıkalyq sarapshysy Pıter Rollbergtiń «1925-1991 jyldardaǵy Keńestik Qazaqstan kınematografy» týraly kitaby tanystyrylǵanyn eske saldy, ol jaqyn arada táýelsiz Qazaqstandaǵy kınonyń damýy týraly ekinshi kitabyn shyǵarýdy josparlap otyr jáne bul shara bizdiń kınematografııa tarıhyn tolyqtyratyn eleýli oqıǵa bolýǵa tıis.
Shaqyrylǵan mańyzdy qonaqtardyń biri Dúnıejúzilik banktiń atqarýshy dırektory Domınık Favre boldy, ol suhbatynda qazaq fılmderiniń tusaýkeserine qatysqanyna qýanyshty ekenin aıtty.
— Men qazaqstandyq kıno óneri juldyzdarynyń ynta-jigerine, onyń mádenı ártúrliligine tańdanǵanym sonsha, onyń kınoındýstrııasy óte tabysty bolatynyna senimdimin, sondyqtan fılmderin osy jerden kórý múmkindigin asyǵa kútemin, - dedi D.Favre.
Sharany uıymdastyrýshylar Ortalyq Azııa kınofestıvali men Qazaq kınosynyń aptalyǵy týraly tolyǵyraq aıtyp berdi.
Jahandyq mýzykalyq seriktestiktiń bıznes-dırektory Rústem Orazaly bıyl Ortalyq Azııa kınofestıvali bastalǵanyn, onyń aıasynda qazaq kınosynyń aptalyǵy ótip jatqanyn atap ótti. Otandyq fılmderdi qazaqstandyq Tiger Films kınokompanııasy usyndy.
Qazaqstan Respýblıkasy kúnine oraı mundaı shara alǵash ret ótkizilip otyr. 26 qazanda «Qazaqtar kelimsekterge qarsy» fılminiń onlaın kórsetilimi bastaldy, 27 qazanda «Oqqaǵar» fılminiń premerasy ótti, «Masha men Dýdaraı» fılmderi de amerıkalyq kórermenderge usynylady.
R.Orazaly Jahandyq mýzykalyq seriktestik aldaǵy ýaqytta Amerıka men Qazaqstan, sondaı-aq Ortalyq Azııa kınosy arasyndaǵy qarym-qatynasty odan ári damyta beretinin aıtty.
«Soltústik Amerıkanyń qazaqstandyq mádenı-iskerlik qaýymdastyǵynyń» («Kazakhstan Cultural-Business Association of North America») prezıdenti Aınur Nurkına Rodjers qaýymdastyq maqsatynyń biri - AQSh-ta jáne jalpy álemde qazaq mádenıetin ilgeriletý ekenin aıtty.
Uıym Qazaqstan men Amerıka arasynda kópir qurýǵa, memlekettik nemese dıplomatııalyq deńgeıde ǵana emes, jeke deńgeıde de baılanys ornatýǵa baǵyttalǵan.
Qaýymdastyq sonymen qatar AQSh-taǵy qolónershilerge, óner adamdaryna jáne basqa da áleýmettik jobalarǵa kómek kórsetedi. Josparda Amerıka men Qazaqstannyń medıtsına qyzmetkerleriniń tájirıbe almasýyn jolǵa qoıý, sondaı-aq erekshe muqtaj balalarǵa kómek kórsetý bar.
Sońǵy úsh jylda 30-dan astam fılm túsirildi, olardyń kópshiligi halyqaralyq kınofestıvalderde júlde alyp, Qazaqstandy shetelde maqtanyshpen tanystyrady. Keler jyly 20-dan astam fılm túsirý jáne «Eńlik-Kebek» jáne «Qyz Jibek» tarıhı fılmderin daıyndaý boıynsha eki iri joba josparlanýda.
AQSh-taǵy qazaqstandyq kıno aptalyǵy amerıkalyq jurtshylyqty Qazaqstan kınoındýstrııasy jumysynyń nátıjelerimen tanystyryp qana qoımaı, eki mádenıetti — Soltústik Amerıka men Ortalyq Azııany ózara baılanystyrýǵa baǵyttalǵan alǵashqy jáne iri mádenı is-shara.
Uıymdastyrýshylardyń oıynsha, aldaǵy ýaqytta festıval Amerıkada da, Qazaqstan men Ortalyq Azııada da birqatar mańyzdy jobalardy iske qosady.
