AQSh-ta qarýly top elektr stansalaryna shabýyl jasady
VAShINGTON. QazAqparat – Soltústik Karolına shtatynda qarýly top eki elektr stansasyna shabýyl jasap, saldarynan ondaǵan myń adam jaryqsyz qaldy, dep habarlaıdy QazAqparat tilshisi.
BBC News málimetinshe, Mýr okrýginde juma kúnge deıin tótenshe jaǵdaı rejımi jarııalanyp, túnde kóshege shyǵýǵa tyıym salyndy.
Soltústik Karolına gýbernatory Roı Kýper shabýyldardyń mundaı túrleri qaýiptiń jańa deńgeıin kórsetip otyrǵanyn jáne mańyzdy ınfraqurylymdy qorǵaý «basty basymdyqqa» aınalatynyn aıtty.
Polıtsııa aqparatyna sáıkes, belgisiz bireýler bir-birinen 8 shaqyrymdaı qashyqtyqta ornalasqan eki qosalqy stansyǵa oq jaýdyrǵan. Shabýyldar josparly jáne maqsatty bolǵan jáne ony jasaýshylardyń nıeti ázirge belgisiz.
Oqıǵa saldarynan Mýr okrýginde 35 myńǵa jýyq adam jaryqsyz qaldy. Bıliktiń aıtýynsha, elektr qýatyn qalpyna keltirý beısenbige deıin sozylýy múmkin, sebebi eki stansa da aıtarlyqtaı zaqymdanǵan.
Jergilikti aýrýhana, dúken, sý jáne káriz qyzmetteri rezervtik generatorlardan qýat alyp jumys isteýde. Okrýgtegi mektepter jabyldy. Dúısenbi kúni tańerteń aýa temperatýrasy 0 gradýsqa jetip, okrýg muqtaj jandardy sport keshenine kóshirdi.
Aq úıdiń Ulttyq qaýipsizdik keńesiniń ókili Djon Kırbı tergeý barysy jiti baqylaýǵa alynǵanyn aıtty.
Foto: Reuters
