AQSh-ta kartalardaǵy Meksıka shyǵanaǵy ataýy Amerıka dep ózgertiledi — Google

ASTANA.KAZINFORM  - Google kompanııasy Donald Tramptyń buıryǵyna sáıkes kartalarǵa ózgeris engizetinin aıtty. Biraq meksıkalyq  paıdalanýshylar úshin burynǵysha Meksıka shyǵanaǵy bolyp qala beredi, dep jazady euronews.com.

Google dúısenbi kúni AQSh-taǵy Google Maps paıdalanýshylary úshin geografııalyq aımaq Amerıka shyǵanaǵy dep ózgertiletinin, al Meksıkada Meksıka shyǵanaǵy bolyp qala beretinin málimdedi. Qalǵan elderdegi paıdalanýshylar eki ataýdy da kóredi. Sondaı-aq kompanııa AQSh paıdalanýshylary úshin Tramptyń buıryǵymen Denalı taýy Mak-Kınlı degen atpen qoldanylatynyn aıtty.

– Bizde resmı memlekettik organdarda jańartylǵan ataýlarǵa ózgeris engizýdiń burynnan kele jatqan tájirıbesi bar. Ártúrli elderdegi resmı ataýlar ártúrli bolǵan kezde, karta paıdalanýshylary (Google) resmı jergilikti ataýdy kóredi. Álemniń qalǵan bóliginde eki ataýdy da kóredi, - delingen Google saıtyndaǵy habarlamada.

Kompanııa ózgerister AQSh úkimeti shyǵanaq pen taýdyń resmı ataýlaryn jańartqannan keıin bolatynyn málimdedi.

Donald Tramptyń Meksıka shyǵanaǵy ataýyn «Amerıka shyǵanaǵy» dep ózgertýge umtylatynyn aıtqany týraly buǵan deıin habarlaǵan bolatynbyz.

Jaýap retinde Meksıka prezıdenti Klaýdıa Sheınbaým Amerıka Qurama Shtattaryna aýmaqtyń tarıhı ataýy «Americana Mexicana» dep qaıtarýdy usyndy.

Tramp sonymen birge Alıaskadaǵy eń bıik Denalı taýynyń ataýyn Mak-Kınlı dep ózgertý týraly jarlyqqa qol qoıdy.

Prezıdent Barak Obama buǵan deıin 2015 jyly Alıaskadaǵy jergilikti taıpalar men saıasatkerlerdiń ótinishi boıynsha taýdyń ataýyn ózgertip, 25-shi prezıdent Ýılıam Mak-Kınlıdiń týǵan jeri Ogaıo shtatynyń turǵyndary narazylyq týdyrǵan bolatyn.