AQSh-ta qarly boran saldarynan shamamen 770 myń adam jaryqsyz qaldy

ASTANA. KAZINFORM — AQSh-ta soqqan qarly boran men qatty aıaz saldarynan 10 myńnan astam áýe reısi toqtatylyp, shamamen 770 myń adam elektr qýatynsyz qaldy, dep habarlaıdy Anadoly.

Elde buryn-sońdy bolmaǵan qalyń qar men qatty sýyq tirkelip otyr.

Qarly boran men aıaz AQSh-tyń ortalyq jáne soltústik-shyǵys shtattarynda, sonyń ishinde Tehas, Nıý-Iork, Nıý-Djersı jáne Vashıngtonda halyqtyń kúndelikti ómirine keri áser etip jatyr.

Eldegi áýe qozǵalysyn baqylaıtyn FlightAware saıtynyń málimetinshe, búgin búkil el boıynsha 10 myńnan astam reıs toqtatylyp, 8 myńnan asa reıs keıinge shegerilgen.

Elektr qýatynyń óshýin onlaın baqylaıtyn PowerOutage saıtynyń deregine sáıkes, qatal qys jaǵdaıyna tap bolǵan shtattarda shamamen 770 myń adam jaryqsyz qalǵan. Onyń ishinde Tennessı shtatynda — 260 myń, Tehasta — 140 myń, Mıssısıpıde — 125 myń adam elektr qýatynsyz otyr.

AQSh astanasy Vashıngtonda 10 santımetrge deıin qar jaýady dep boljanǵan, al Nıý-Iork pen Nıý-Djersı shtattarynda 30 santımetrge deıin qar túsýi múmkin. Nıý-Iork meri Zoran Mamdanı erteń qaladaǵy mektepter jabylatynyn málimdedi.

— Qar qalany basyp, jaǵdaı qaýipti bola bastaǵanda, mektepterdi jabý — Nıý-Iork turǵyndarynyń qaýipsizdigin qamtamasyz etý úshin qajet qadam, — dedi Mamdanı jergilikti BAQ-qa bergen málimdemesinde.

AQSh Ulttyq meteorologııalyq qyzmetiniń habarlaýynsha, el boıynsha 190 mıllıon adam ońtústik shtattarda qaýipti kóktaıǵaqqa, al soltústik-shyǵysta qarly boran qaýpine ushyrap otyr.

Bılik ókilderi qarly borannyń eldiń basym bóliginde erteńge deıin jalǵasatynyn, odan keıin aýa temperatýrasy kúrt tómendep, kóktaıǵaq bolatynyn eskertti. Bul jaǵdaı aldaǵy birneshe kúnde kólik pen ınfraqurylymǵa eleýli qaýip tóndirýi múmkin.

Osyǵan deıin AQSh-tyń birqatar shtatynda «Fern» daýylyna baılanysty tótenshe jaǵdaı jarııalanǵany belgili boldy.