AQSh-ta Kapıtolııge shabýyl jasap, keıin aqtalǵan adamdy polıtsııa atyp tastady

ASTANA. KAZINFORM – 2021 jyldyń 6 qańtarynda Kapıtolııge shabýyl jasaǵandarǵa AQSh prezıdenti Donald Tramp raqymshylyq jasaǵan bolatyn. Olardyń arasynda Indıana shtatynyń azamaty da bar edi. Osy azamat raqymshylyq jasalǵannan keıin birneshe kúnnen soń polıtsııa qyzmetkeriniń qolynan qaza tapty, dep habarlaıdy VVS.

42 jastaǵy Mettıý Hattl jeksenbi, 26 qańtarda atyp óltirildi. Indıana shtatynyń polıtsııasy málimdegendeı, tártip saqshylary onyń kóligin toqtatyp, ustamaq bolǵan. Biraq, Hattl qarsylyq tanytyp, ofıtsermen janjaldasyp, aqyry ofıtser oǵan oq atqan. Kúdikti alǵan jaraqatynan kóz jumdy.

Polıtsııa qyzmetkeri aqyly ákimshilik demalysqa jiberildi.

- Tolyq ashyqtyq úshin men Indıana shtatynyń polıtsııasynan atysqa qatysy bar ofıtserge qatysty tergeý júrgizýdi suradym, - dedi Djasper okrýginiń sherıfi Patrık Ýılıamson.

Er adamnyń ne sebepti ustalǵany belgisiz. Polıtsııa Hattldyń ózimen birge atys qarýy bolǵanyn qosyp ótti.

Mettıý Hattl 2022 jyldyń qarashasynda tártip buzǵany jáne kirýge tyıym salynǵan ǵımaratqa kirgeni úshin qamaýǵa alyndy. Ol Kapıtolııde 16 mınýt boldy. Onyń qorǵaýshysynyń aıtýynsha, Hattl saıası belsendi emes edi.

Ol 6 qańtarda aǵasymen Vashıngtonǵa keldi. Ol ózderi oqtalǵan is «tarıhta qalatyn oqıǵa bolady» dep sendi, odan keıin ol jol erejesin buzǵany úshin túrmege otyryp kelgen soń nemen aınalysaryn bilmeı júrdi. Osynyń barlyǵy Hatll-dyń zańsyz áreketke barýyna sebep boldy.

Ol kinásin moıyndap, alty aıǵa bas bostandyǵynan aıyryldy. 2024 jyldyń shildesinde bosatylýy tıis edi.

Advokattyń sendirýinshe, Hattl sotqar emes.

Onyń aǵasy Deıl Hattl da tártipsizdikterge qatysqan jáne ǵımaratty basyp alǵanyna esh ókinbeıdi, muny «patrıottyq paryz» dep sanaıdy. Polıtsııa qyzmetkerine flagshtokpen shabýyl jasaǵany úshin ol 30 aıǵa bas bostandyǵynan aıyryldy.

Denıel Bell sııaqty qarý saqtaǵany úshin qamaýǵa alynǵan Kapıtolıı búlikshilerine raqymshylyq jasalǵannan keıin jańa quqyqtyq máseleler týyndap otyr. Donald Tramp 1600-ge jýyq búlikshige raqymshylyq jasady. Alaıda onyń sheshimin respýblıkashyldardyń bári birdeı qoldaǵan joq. Senator Lındsı Grem keshirim jasaýdy qatelik dep atap, bul polıtsııa qyzmetkerlerine qatysty ádiletsizdik dep sanaıdy.

Washington Post málimetinshe, 2015 jyldan 2024 jylǵa deıin AQSh-ta polıtsııa 10 429 adamdy atyp óltirgen.

Osyǵan deıin AQSh Kongresi zańsyz mıgranttardy qamaýǵa alý týraly zań qabyldaǵany týraly jazdyq.