AQSh-ta istemegen qylmysy úshin 39 jyl túrmede otyrǵan er adam bostandyqqa shyqty
ASTANA. QazAqparat - Amerıkandyq Klıvlend (Ogaıo) qalasynyń soty sot sheshiminiń qateliginen temir torda 39 jyl ǵumyryn ótkizgen 57 jastaǵy Rıka Djeksondy túrmeden bosatýǵa qaýly shyǵardy, dep habarlady TASS.
1975 jyly 19 jastaǵy Djekson jáne onyń eki tanysy - aǵaıyndy Ýaılı men Ronnı Brıdjmender klıvlendtik kásipkerdi óltirýge kúdikti retinde ustaldy.
Sotta 12 jasar bala kýálik berdi, ol úsh adamnyń kásipkerdi qalaı óltirgenin kórgenin aıtty. Qorytyndysynda alqa bıler Djeksondy ólim jazasyna, al Brıdjmenderdi uzaq merzimge túrmege otyrǵyzýǵa úkim shyǵardy. 1978 jyly Ogaıoda eń joǵarǵy jaza alynyp tastaldy, al Djekson ómir boıy túrmede otyrýǵa tıis boldy.
Alaıda ótken jyly kýáger retinde sóılegen adam detektıvter tarapynan qysym bolǵandyqtan Djekson men onyń dostaryn naqaqtan qaralaǵanyn moıyndady.
Osy aptada sot istiń jańa jaǵdaılaryn zerdeleı kelip, onyń kinásiz ekenin tanydy. Djekson túrme qaqpasynan jaqsy kóńil kúımen shyqty.
«Men kinásiz ekenimdi bildim, shynynda da men ózimdi eshqashan da sottalǵan adammyn dep eseptegen joqpyn» - dep málimdedi ol. Brıdjmender bostandyqqa 2003 jyly shyqty, alaıda Ýaılı kóp uzamaı merziminen buryn bosatylý sharttaryn buzǵany úshin qaıtadan túrmege qamaldy. Búgin ol da Djeksonmen birge bostandyq aldy.
Amerıkandyq BAQ-tyń málimetine qaraǵanda, 1973 jyldan beri túrmege qatelikpen túsken 148 adam bosatyldy. Olardyń ishinde Djekson temir torda uzaǵyraq otyrǵan.
