AQSh-ta ıpotekanyń ortasha aılyq tólemi 2000 dollardan asty
ASTANA. KAZINFORM – AQSh-ta ıpotekalyq nesıeler boıynsha ortasha aılyq tólem 2000 dollardan asyp, turǵyn úıdiń qoljetimdiligi máselesiniń kúsheıgenin kórsetti, dep habarlaıdy Kazinform tilshisi Vashıngtonnan.
Realtor.com derekterine sáıkes, ótelmegen ıpotekalyq nesıeler boıynsha ortasha tólem sońǵy jyldary aıtarlyqtaı ósken. Máselen, 2013 jyldyń basynda bul kórsetkish 1255 dollardy qurasa, 2020 jyldyń basynda 1456 dollarǵa deıin birtindep artqan. Keıin turǵyn úı baǵasynyń qymbattaýy jáne ıpotekalyq nesıeler sanynyń kóbeıýi aıasynda ósim qarqyny jedeldegen.
– Sońǵy tórt jylda ıpoteka boıynsha ortasha aılyq tólem 1390 dollardan 2005 dollarǵa deıin ósip, shamamen 44%-ǵa artty. Bul AQSh-ta turǵyn úıdiń qoljetimdiligine qysym kúsheıgenin kórsetedi, – delingen zertteýde.
Esepke sáıkes, ıpotekalyq nesıelerdiń 50,6%-y jyldyq mólsherlemesi 4% jáne odan tómen deńgeıde berilgen. Al 27,4%-y 4-6% aralyǵynda rásimdelgen.
Sondaı-aq bastapqy jarnasy 6% jáne odan joǵary ıpotekalardyń úlesi 21,9%-ǵa jetken. Bul 2024 jyldyń sońyndaǵy 18%-ben salystyrǵanda 3,9 paıyzdyq tarmaqqa kóp. Sarapshylar bul ósimdi joǵary paıyzdyq mólsherlemelerge qaramastan turǵyn úıge suranystyń saqtalýymen baılanystyrady.
– Joǵary mólsherlemelerge qaramastan, satyp alýshylar belsendiliginiń saqtalýy ıpotekalyq naryqtaǵy qysymdy arttyryp otyr, – dep atap ótilgen esepte.
Aıta keteıik, Shvetsııa ıpotekalyq nesıe berý talaptaryn jeńildetedi.
