AQSh-ta Hyundai kompanııasynyń 94 myńnan astam kóligi keri qaıtarylady
ASTANA. KAZINFORM — AQSh-tyń Jol qozǵalysy qaýipsizdigi ulttyq basqarmasy (NHTSA) aldyńǵy oryndyqtardy retteıtin elektr qozǵaltqyshtarynyń qyzyp ketýinen týyndaıtyn órtke baılanysty Hyundai kompanııasynyń 94 622 avtokóligin keri qaıtaryp jatqanyn málimdedi. Bul týraly Kazinform agenttiginiń Vashıngtondaǵy menshikti tilshisi FOX Business basylymyna silteme jasap habarlaıdy.
Hyundai kompanııasynyń málimdeýinshe, aldyńǵy oryndyqtyń bıiktigi men kólbeýin retteıtin qosqysh syrtqy kúshtiń áserinen jyljyp ketýi nemese zaqymdanýy múmkin. Bul jaǵdaıda qosqysh qosýly kúıde qalyp, kólik ıesi kólikten shyqqannan keıin de oryndyqty retteıtin elektr qozǵaltqyshy úzdiksiz jumys isteıdi.
Qozǵaltqyshtyń kóp ýaqyt jumys isteýi onyń qyzyp ketýine ákelip, kólik júrip kele jatqanda nemese turaqta turǵanda órt shyǵý qaýpin týdyrady.
Keri qaıtaryp alý 2017-2020 jyldary shyqqan 39 978 Genesis G80 kóligi men 2015–2016 jyldary shyǵarylǵan 54 644 Hyundai Genesis sedanyna qatysty.
NHTSA jóndeý aıaqtalǵanǵa deıin atalǵan kólikterdiń ıelerine avtokólikterin basqa kólikter men ǵımarattardan alys, ashyq jerde turaqqa qoıýdy usynady.
Buǵan deıin AQSh-ta 31 myńǵa jýyq Toyota RAV4 gıbrıdti kóligi keri qaıtarylatyny habarlanǵan bolatyn.
