AQSh-ta hımııalyq zaýytta jarylys boldy: qaza tapqandar bar
ASTANA. KAZINFORM – AQSh-tyń Vashıngton shtatyndaǵy Longvıý qalasyndaǵy zaýytta ishinde hımıkattar bar tsısterna jarylyp, bir adam qaza tapty, toǵyz adam iz-túzsiz joǵaldy, dep habarlaıdy NBC News.
Oqıǵa seısenbi, 26 mamyrda tańerteń Nippon Dynawave Packaging zaýytynda boldy. Tsellıýloza óndirisinde qoldanylatyn hımııalyq zat - aq silti bar rezervýar jaryldy.
PeaceHealth St. John Medical Center medıtsınalyq ortalyǵyna jaraqat alǵan toǵyz adam, onyń ishinde bir órt sóndirýshi túsken. Naýqastar jeńilden aýyrǵa deıin túrli jaraqat alǵan. Keıbireýlerine kúıik jáne tynys alý joldarynyń jaraqattary dıagnozy qoıyldy. Tek alty adamnyń jaǵdaıy qanaǵattanarlyq.
Órt sóndirýshilerdiń málimetinshe, qulaǵan rezervýarda áli de hımııalyq suıyqtyq bar. Bul qutqarýshylardyń zardap shekkenderge jetýin qıyndatyp otyr.
Bastapqyda bılik rezervýar syıymdylyǵyn 80 myń gallon (302 800 lıtr) ekenin habarlaǵan. Biraq keıinirek onyń ishinde shamamen 900 myń gallon (3,4 mln lıtr) aq silti bolǵany anyqtaldy.
Vashıngton shtatynyń gýbernatory Bob Ferguson adamdardyń qaza taýyp, jaraqat alýyna baılanysty kóńil aıtyp, oqıǵa ornyna shtattyń Ekologııa departamentiniń qyzmetkerleri jiberilgenin habarlady.
Bılik jaqyn mańdaǵy eldi mekenderge esh qaýip tónip turmaǵanyn málimdedi. Biraq turǵyndardy zaýyttan aýlaq júrýge shaqyrdy.
Zaýytta shamamen 1000 adamdy jumys isteıdi. Ol maılyqtar, baspa qaǵazy, qaǵaz staqan men tárelkelerge, sondaı-aq sút pen tamaq ónimderine arnalǵan karton qoraptar men konteınerlerge arnalǵan materıaldar shyǵarady.
Osyǵan deıin Kalıfornııadaǵy aeroǵarysh zaýytynan ýly bý shyǵyp, 40 myń adam evakýatsııalanǵanyn habarladyq.
