AQSh-ta Helloýın merekesinde 60-tan astam adam jaraqat aldy
ASTANA. KAZINFORM — Helloýın qarsańynda AQSh-tyń jeti shtatynda bolǵan atystardan 12 adam qaza taýyp, 50-den astam adam jaralandy, dep habarlaıdy Kazinform agenttiginiń menshikti tilshisi NBC News silteme jasap.
Tehas shtatynyń Dallas qalasynda oıyn-saýyq aýdanynda Helloýın merekesinde úsh atys boldy. Saldarynan tórt adam qaza taýyp, 15 adam jaralandy.
Alabama shtatynyń Bırmıngem qalasynda Alabama ýnıversıteti men Alabama aýylsharýashylyq jáne mehanıkalyq ýnıversıteti arasynda jyl saıyn ótetin fýtbol oıynynan keıin «Legıon-Fıld» mańynda bolǵan atystan bir adam qaza taýyp, segiz adam jaralandy. Atystyń mán-jaıy áli belgisiz.
Kolorado shtatynyń Boýlder qalasynda merekelik keshte bolǵan atysta Kolorado ýnıversıtetiniń 19 jastaǵy eki stýdenti jaralanyp, artynsha bireýi qaıtys boldy. Oqıǵaǵa qatysy bar degen kúdikpen mas er adam qamaýǵa alyndy.
Florıda shtatynyń Djeksonvıll qalasynda Helloýın keshinde bolǵan eki atys saldarynan 17 jastaǵy qyz ben 20 jastaǵy jigit qaza tapty. Taǵy on bir adam jaralanǵan. Qyz qańǵyǵan oqtyń qurbany bolǵan, al er adam tóbeles kezinde qaıtys boldy. Illınoıs shtatynyń Blýmıngton qalasynda Illınoıs Ýeslıan ýnıversıtetiniń mańyndaǵy atysta 19 jastaǵy áıel qaza taýyp, jeti adam jaraqat aldy.
Mıssısıpı shtatynyń Djekson qalasynda túngi klýbta bir er adam men bir áıel oqtan qaza taýyp, eki adam jaralanǵan. Taǵy bir oqıǵada tańǵy saǵat 2:00–de kóshedegi atysta bir adam qaza taýyp, birneshe adam jaralandy.
Delaver shtatynyń Nıýark qalasyndaǵy Delaver ýnıversıtetiniń mańynda alty adam jaralandy, sonyń biri jas bala.
Buǵan deıin Germanııada balalarǵa arnalǵan Helloýın kámpıtinen ıneler men bolttar tabylǵany habarlanǵan bolatyn.
