AQSh-ta Gennadıı Golovkınniń qoltańbasy bar zattar keńinen satylýda (FOTO)
ASTANA. QazAqparat - AQSh-ta qazaqstandyq boksshy Gennadıı Golovkınniń qoltańbasy bar zattar keńinen satylýda. Olardyń ishinde bokserlik qolǵaptan bastap, Golovkınniń qoltańbasy men sýreti basylǵan fýtbolkalar, kepkalar, tipti GGG belgisi bar qazaqsha shapan da bar.
Mysaly, ebay.com saıtynda Golovkınniń qoltańbasy bar bylǵary qolǵap 68 AQSh dollarynan bastap, 499 dollar aralyǵynda satylyp jatyr. Al shapan bolsa 449 dollarǵa baǵalanǵan. Al Golovkınniń jekpe-jeginiń erekshe beınelengen sýretter 250 dollarǵa baǵalanyp otyr. Barlyǵy 280-nen astam jarnama salynǵan. Sondaı-aq jarnamaǵa berilgen zattardyń basym bóliginde Golovkınniń dál osy zatqa qoltańbasyn qoıyp jatqan sáti de kórsetilgen.
