AQSh-ta G7 elderiniń ishindegi eń joǵary ınflıatsııa ósimi tirkeldi

NUR-SULTAN. QazAqparat – AQSh-ta ınflıatsııa deńgeıi ekonomıkasy damyǵan «Úlken jetilik» (G7) tobyna kiretin elder arasynda eń joǵary kórsetkishke jetti, dep habarlaıdy QazAqparat BBC News basylymyna silteme jasap.

Ekonomıkalyq yntymaqtastyq jáne damý uıymynyń (EYDU) málimetteri boıynsha Amerıka ekonomıkasy «Úlken jetiliktegi» basqa eldermen salystyrǵanda eń kóp zardap shekti. Ótken jyldan bastap AQSh-ta baǵalar sáýir aıynda 4,7%-dan 8,6%-ǵa deıin eki ese ósti.

AQSh-tan keıin ınflıatsııanyń joǵary deńgeıi Ulybrıtanııada – 7,8%, Germanııada – 7,4%, Kanadada– 6,8%, Italııada – 6%, Frantsııada – 4,8% jáne Japonııada 2,5% deńgeıinde baıqaldy.

AQSh-tyń aýyr jaǵdaıǵa tap bolýynyń sebebi halyq arasyndaǵy suranystyń joǵary bolýyna baılanysty bolyp otyr, al oǵan kásiporyndar daıyn emes.

AQSh úkimeti úı sharýashylyqtary men kásiporyndardy pandemııadan týyndaǵan ekonomıkalyq zardaptardan qorǵaý úshin 5 trln dollar bólýdi maquldady. Bul shara jıhaz, avtomobılder jáne elektronıka sııaqty taýarlarǵa tapsyrystardyń kúrt ósýine ákeldi. Joǵary tutynýshylyq suranys usynys máselelerimen soqtyǵysyp, baǵanyń ósýine sebep boldy.

San-Frantsısko Federaldy rezervtik bankiniń zertteýi pandemııaǵa qarsy kómek paketteri ınflıatsııaǵa 3% yqpal etkenin kórsetti. Bul AQSh-taǵy ekonomıkalyq jaǵdaıdyń nasharlaǵanyn bildiredi.

EYDU ınflıatsııa bıyl eń joǵary deńgeıge jetedi dep boljap otyr. Bul ekonomıkasy damyǵan elder arasynda ortasha eseppen 5,5%-dy jáne uıymnyń qalǵan músheleri úshin 8,5%-dy quraıdy.