AQSh-ta festıvalde tigilgen qazaq kıiz úıi qumdy daýylǵa tótep berdi
ASTANA. KAZINFORM — AQSh-tyń Nevada shtatyndaǵy Blek-Rok shólinde ótken Burning Man festıvali kezinde qatty qumdy daýyl soqty. Bul týraly Kazinform agenttigi Travel And Tour World basylymyna silteme jasap habarlaıdy.
Alǵashqy kúni-aq Blek-Rok shólinde qumdy daýyl soǵyp, festıvaldiń ótýine aıtarlyqtaı kedergi keltirdi. Saǵatyna 80 shaqyrymǵa deıin jetken qatty jel birneshe mańyzdy art-ınstallıatsııany qıratyp, qatysýshylar men uıymdastyrýshylarǵa qıyn jaǵdaı týǵyzdy. Kem degende tórt adam jeńil jaraqat aldy. Birqatar kempıng qırap, festıvalge qatysýshylardyń deni baspana izdeýge nemese jabdyǵyn jedel jóndeýge týra keldi.
Álemdegi eń iri óner men ózin-ózi kórsetý festıvalinde bıyl alǵash ret qazaqstandyq delegatsııa ulttyq kıiz úıdi tanystyrdy. Ol qatty qumdy daýylǵa tótep berdi.
Bul týraly jeke paraqshasynda kıiz úıdi Burning Man-de ornatqan toptyń múshesi Sabına Omar habarlady.
— Biz qazaq kıiz úıine tyǵyldyq, eń durys sheshim boldy. Syrtta alaı-dúleı bolyp jatqanda, kıiz úıdiń ishinde qaýipsiz boldy. Tańqalarlyǵy, mádenıetimizdiń sımvoly qazaq kıiz úıi Amerıka shóliniń qaq ortasyndaǵy qumdy daýylda qorǵan bolǵany, — dep jazdy ol.
Qıyndyqtarǵa qaramastan, is-shara kelesi kúni qaıta jalǵasty. Sınoptıkter qatysýshylardy naızaǵaı men shaǵyn tasqyn bolýy múmkin ekenin eskertti.
Qumdy daýyl týdyrǵan qıyndyqtarǵa qaramastan, Burning Man 2025 ótken jyldarmen salystyrǵanda qatysýshylar sanynyń aıtarlyqtaı óskenin kórsetti. Sońǵy málimetke sáıkes, festıvalge shamamen 72 myń adam kelgen, bul ótken jylǵy 70 myńnan artyq.
Burning Man — jyl saıyn AQSh-tyń Nevada shtatyndaǵy Blek-Rok shólinde ótkiziletin segiz kúndik festıval. Onda qatysýshylar ýaqytsha qala turǵyzyp, ony ónermen, shyǵarmashylyqpen jáne ózindik ereksheligimen toltyrady.
Bıyl festıval 1 qyrkúıekke deıin jalǵasady.
Aıta ketsek, dúnıejúzilik EXPO-2025 kórmesindegi 10 tamyz kúni Osaka qalasyndaǵy basty sımvol — kıiz úı boldy. Bul kóshpeli halyqtyń baspanasy, otbasy jáne turmys-tirshiliginiń beınesi.