AQSh-ta Federaldy tergeý basqarmasynyń burynǵy basshysynyń jazbasy boıynsha tekserý bastaldy

ASTANA. KAZINFORM – AQSh-tyń Іshki qaýipsizdik mınıstrligi men Qupııa qyzmet Federaldy tergeý basqarmasynyń burynǵy basshysy Djeıms Komıge qatysty tergeýdi bastady, dep habarlaıdy VVS.

NBC News-tiń habarlaýynsha, tergeýge Komıdiń Instagram jelisine qaldyrǵan jazbasy sebep bolyp otyr. Onda qumǵa jazylǵan «86 47» degen belgini kórýge bolady.

BAQ ókilderiniń habarlaýynsha, 86 degen belgi bireýdiń kózin joıý degendi bildiredi. 47 degen AQSh-tyń 47-shi prezıdenti Donald Trampty degen maǵyna berýi múmkin.

Bul belginiń kisi óltirýge baǵyttalǵanyn Іshki qaýipsizdik mınıstri Krıstı Noem-di qosa alǵanda prezıdenttiń birneshe jaqtasy jazdy.

Qupııa qyzmet ókili «Agenttik bizdiń qorǵaýymyzdaǵy adamdardyń ómirine qaýip tóndirip otyr dep baǵalanǵan kez-kelgen jáıtti muqııat tergeıdi» dep málimdedi.

Djeıs Komı Federaldy tergeý basqarmasyn 2013-2017 jyldary basqardy. Tramp ony óziniń birinshi prezıdentik merziminde qyzmetinen bosatty. Oǵan 2016 jylǵy prezıdenttik naýqan kezinde Tramp ókilderiniń Reseımen bolýy múmkin baılanysty anyqtaý baǵytynda júrgizgen tergeý sharalary sebep bolǵan.

Komı ózine qarata aıtylǵan synnan soń jazbasyn alyp tastady. Ol bul tsıfrlardy eshqashan da zorlyq-zombylyqpen baılanystyrmaǵanyn jáne óziniń kez-kelgen kúsh kórsetýge qarsy ekenin jazdy.

Osyǵan deıin AQSh-ta esirtkiniń artyq dozasynan ólim 27%-ǵa tómendegeni týraly jazdyq.