AQSh-ta esirtki kartelderine qarsy keń aýqymdy áskerı naýqan bastaldy

ASTANA. KAZINFORM — ASTANA. KAZINFORM — «Ońtústik naıza» ataýyna ıe bolǵan operatsııa Batys jarty shardaǵy esirtki lańkesterin joıýǵa baǵyttalǵan, dep málimdedi Pentagon basshysy Pıt Hegset. Bul týraly DW aqparat agenttigi habarlaıdy. 

Pentagon basshysy Pıt Hegset Batys jarty shardaǵy esirtki kartelderine qarsy Southern Spear («Ońtústik naıza») dep atalatyn jańa operatsııanyń bastalǵanyn jarııalady.

— Bul mıssııa bizdiń Otanymyzdy qorǵaıdy, jarty shardan esirtki lańkesterin joıady jáne halqymyzdy óltirip jatqan esirtkiden elimizdiń qaýipsizdigin qamtamasyz etedi. Batys jarty shar — Amerıka aýmaǵy, jáne biz ony qorǵaımyz, — dep jazdy Hegset beısenbi, 13 qarashada X áleýmettik jelisinde.

AQSh qorǵanys mınıstriniń aıtýynsha, operatsııany osy maqsatta qurylǵan arnaıy top jáne AQSh QK Ońtústik qolbasshylyǵy (Southcom) basqarady. Southcom buǵan deıin USS Gerald R. Ford ushaq tasyǵyshyn alǵan. Ol Pýerto-Rıkoda ornalastyrylǵan basqa áskerı kemelerge, ıadrolyq súńgýir qaıyqtarǵa jáne ushaqtarǵa qosylady.

Qyrkúıek aıynyń basynan beri amerıkalyq kemeler Vashıngton venesýelalyq esirtki kartelderimen baılanysy bar dep kúdiktenetin halyqaralyq sýlardaǵy kemelerge únemi shabýyl jasap keledi. Sonymen qatar, AQSh esirtki saýdagerlerimen kúresti syltaýratyp, Venesýela jaǵalaýyna kemeler tobyn jáne Pýerto-Rıkoda joıǵysh ushaqtar ornalastyrdy.

Buǵan deıin AQSh-tyń ushaq tasymaldaýshy kemeleri Karıb teńizi aıdynyna engenin jazǵan bolatynbyz.