AQSh-ta er azamattar botoksqa úıir bola bastady
ASTANA. KAZINFORM — AQSh-ta Botox, Daxxify jáne Xeomin sııaqty neırotoksın egý er adamdar arasynda tez tanymal bola bastady, dep habarlaıdy Kazinform Vashıngtondaǵy tilshisi American Spa basylymyna silteme jasap.
2022 jyldan 2026 jylǵa deıingi kezeńdegi myńdaǵan klınıkalardyń derekterine negizdelgen Guidepoint Qsight jańa esebine sáıkes, er adamdar estetıkalyq protsedýralar naryǵynda mańyzdy aýdıtorııaǵa aınalyp barady.
2026 jyldyń úshinshi toqsanynda er adamdardyń bir protsedýraǵa jumsaıtyn ortasha shyǵyny 529 dollarǵa jetti, al áıelder orta eseppen 455 dollar jumsaıdy. Bul aıyrmashylyq er adamdarǵa arnalǵan ónimderdiń qymbattaýyna baılanysty emes, olarǵa protsedýralyq ónimder áıelderge qaraǵanda 10-15%-ǵa kóp jumsalady.
Ásirese AQSh-tyń batysynda er adamdardyń neırotoksınderge jumsaıtyn shyǵyndary 40%-ǵa deıin jetedi, al áıelder jalpy shyǵynynyń 30%-yn jumsaıdy. Al Orta Batys pen Soltústik-Shyǵys shtattary estetıkalyq emhanalar úshin jańa er klıentterdi tartatyn perspektıvaly aımaqtar bolyp otyr.
Jas jaǵynan, X býynǵa jatatyn (1965 jyldan 1980 jylǵa deıin týǵan) er adamdar kósh bastap tur, mıllenıaldar (1981 jyldan 1996 jylǵa deıin týǵandar) da H býyndy qýyp keledi. Óıtkeni olar qazirdiń ózinde osy qyzmetke júginetin er azamattardyń 36%-yn quraıdy. Z býyn (1995 jyldan 2010 jylǵa deıin týǵan) men mıllenıaldar neırotoksınge alǵash júgingen jańa patsıentterdiń jartysynan kóbin qurap otyr. Bul jastar arasynda da estetıkalyq medıtsınaǵa degen qyzyǵýshylyqtyń artqanyn kórsetedi.
2026 jylǵy suranystyń ósimi ýaqytsha qubylys bolýy da múmkin. Al eger bul úrdis kelesi toqsandarda da jalǵasa berse, emhanalar ázirge suranys az shtattarda da marketıngdi kúsheıtýge daıyn otyr.
Aıta keteıik, AQSh ǵalymdary temekini tastaýdyń tıimdi tásilin anyqtady.
