AQSh-ta er adam saıabaqtan 7-karatty almaz taýyp aldy
ASTANA. KAZINFORM – AQSh-tyń Arkanzas shtatyndaǵy Paık okrýginde ornalasqan «Krater Daımonds» memlekettik saıabaǵynan er adam jalpy salmaǵy jeti karattan asatyn baǵaly tas taýyp aldy.
Fox News habarlaýynsha, Parıj turǵyny Jıýlen Navas Amerıkada júrgeninde «Arkanzas almaz krateri» memlekettik saıabaǵy týraly estip qatty qyzyqty. Er adamnyń bul qyzyǵýshylyǵy buryn altyn jáne tasqa aınalǵan ammonıt izdeýmen aınalysqanymen baılanysty boldy.
J.Navas saıabaqta almaz izdeýge arnalǵan jıyntyq satyp alyp, baǵaly tastardy izdeýge kiristi. Birneshe saǵattan soń ol tapqan zattaryn saıabaqtyń almazdardy izdeý ortalyǵyna ákelip, sonyń arasynan salmaǵy 7,46 karat qońyr almaz anyqtaldy.
J.Navastyń saıabaqqa kelýinen birneshe kún buryn onda qatty jańbyr jaýdy. Ol topyraqtyń bir bóligin shaıyp jiberip, jer betinde aýyr tastar, mıneraldar men almazdardyń kórinýine sebep boldy.
J.Navas bul tasty qalyńdyǵy Karınniń qurmetine atady. Ol tasty eki brıllıantqa qyrlap mánerleýdi josparlap, birin qalyńdyǵyna, ekinshisin qyzyna syıǵa tartpaq.
