AQSh-ta energetıkalyq qaýipsizdikti qamtamasyz etý maqsatynda tótenshe jaǵdaı jarııalandy
ASTANA. KAZINFORM — AQSh Prezıdenti ortalyqtandyrylǵan energetıka júıesin sheteldik qurylǵylarmen jabdyqtaýdyń ulǵaıýynan ulttyq qaýipsizdikke qater tónýine baılanysty elde tótenshe jaǵdaı jarııalady. Bul týraly Kazinform agenttiginiń Vashıngtondaǵy tilshisi Aq úıge silteme jasap habarlaıdy.
Tramp ákimshiligi shet memleketter men uıymdar bul jabdyqtardyń osal tustaryn óz múddesine paıdalanýy, máselen kıbershabýyl men dıversııa jasaýy, júıege qashyqtan qol jetkizýi jáne energııa jetkiziliminiń buzylýy múmkin dep esepteıdi. Elektr energııasyna suranystyń artýy mundaı qaýipterdiń yqtımal áserin kúsheıte túsedi. Ásirese bul joǵary tehnologııalyq óndiris, derekter ortalyqtary, jasandy ıntellekt jáne qorǵanys ónerkásibi úshin mańyzdy.
Jarlyqqa sáıkes, magıstraldy energojúıelerge arnalǵan sheteldik elektr jabdyqtaryna qatysty birqatar mámilege tyıym salynady. Bul shekteý dıversııaǵa, jetkizilimderdiń buzylýyna, ruqsatsyz qol jetkizýge ákelýi nemese AQSh-tyń asa mańyzdy ınfraqurylymy men ekonomıkasyna eleýli zııan keltirýi múmkin mámilelerge qatysty. Bul shekteýler atalǵan jabdyqtyń baǵdarlamalyq jasaqtamasy men mıkrobaǵdarlamalaryn da qamtıdy. Sondaı-aq tsıfrlyq qyzmetterdi kórsetýge, tehnıkalyq qyzmetke jáne qashyqtan qol jetkizýge de tyıym salyndy.
Energetıka mınıstrine elde buryn ornatylǵan sheteldik jabdyqtardy baqylaý ókilettigi beriledi. Qaýip tóndiretin nysandar anyqtalǵan jaǵdaıda olar oqshaýlanyp, ajyratylýy nemese aýystyrylýy yqtımal. Jabdyqtardyń jaı-kúıi de turaqty baqylaýda bolady. Bul rette energııamen jabdyqtaýdyń turaqtylyǵy men balama nusqalar eskeriledi. Sonymen qatar qaýipsiz qurylǵylar men senimdi jetkizýshilerdi aldyn ala maquldaý talaptary belgilenedi.
Jarlyqty iske asyrý erejeleri 120 kún ishinde ázirlenip, ulttyq qaýipsizdikke qater tóndirýi múmkin jabdyqtar men jetkizýshilerdiń tizimi jasalady. Al 180 kún ishinde Energetıka mınıstri federaldyq satyp alý erejelerin qaıta qaraý jóninde usynys engizýge tıis. Bul rette ulttyq qaýipsizdik qaterleri eskerilip, amerıkalyq óndiristegi energetıkalyq ınfraqurylymǵa basymdyq beriledi.
Qujatta magıstraldy energojúıe, sheteldik jabdyqtar men tıisti uıymdarǵa qatysty negizgi uǵymdar aıqyndalǵan. Budan bólek, onyń oryndalý barysy týraly Kongreske turaqty túrde esep berý mindeti belgilengen.
Buǵan deıin AQSh-tyń sý júıelerine hakerlik shabýyl jasalǵany habarlanǵan bolatyn.
Aqzat Jıenalına
