AQSh-ta eń iri áýe kompanııasy janarmaı baǵasynyń ósýine baılanysty jabyldy
ASTANA. KAZINFORM — Soltústik Amerıkadaǵy eń iri loýkoster bolǵan Spirit Airlines óz jumysyn toqtatatynyn málimdedi, dep habarlaıdy BBC.
Tasymaldaýshy Donald Tramp ákimshiligimen qarjylyq kómek týraly kelisimge kele almady. Kompanııa úshin sońǵy soqqy AQSh pen Izraıldiń Iranmen qaqtyǵysy saldarynan avıaotyn baǵasynyń qymbattaýy boldy.
Spirit Airlines AQSh prezıdenti ákimshiligimen 500 mln dollarlyq kómek paketi boıynsha kelissózder júrgizgen, biraq olar nátıje bermedi. Kompanııa óz saıtynda «qatty kóńili qalǵanyn» jáne «qyzmetin dereý toqtatatynyn» habarlady.
Ótken jyldyń tamyzynda Spirit bir jyl ishinde ekinshi ret bankrottyqqa ótinish bergen edi. Osydan keıin kompanııanyń jaǵdaıy túzele bastaǵan, alaıda sońǵy aılarda AQSh pen Izraıldiń Iranmen qaqtyǵysy jáne Ormýz buǵazynyń ishinara blokadasy saldarynan avıaotyn baǵasynyń kúrt ósýi ony tyǵyryqqa tiredi.
Kóptegen jolaýshylar ushaqtaryna quıylatyn Jet A-1 markaly otyn baǵasy sońǵy aptalarda shamamen eki esege ósti.
Spirit Airlines juma men senbige qaraǵan túni barlyq reısterin toqtatyp, jolaýshylarǵa bılet aqysyn qaıtarýǵa ýáde berdi.
60 jyldan astam ýaqyt buryn qurylǵan Spirit jabylar sátte A320 eýropalyq Airbus kontserniniń 100-den astam ushaǵynyń parkine ıe boldy. Onyń ishinde eń jańasy - A320neo jáne A321neo. Olar AQSh, Meksıka, Karıb teńizi elderi men Ońtústik Amerıkanyń birqatar baǵytyna ushyp júrdi.
Buǵan deıin Lufthansa ushaq otynynyń qymbattaýyna baılanysty 20 myń reısti toqtatatyny týraly jazdyq.
