AQSh-ta elektr energııasynyń baǵasy kúrt ósti

ASTANA. KAZINFORM – Qys mezgili amerıkalyqtar úshin qıyn soǵyp otyr. Onda elektr energııasynyń baǵasy ósti, sondaı-aq jasandy ıntellekt málimetterin óńdeıtin ortalyqtar sanynyń artýyna baılanysty elektr jelilerine júkteme kúsheıdi, dep habarlaıdy Kazinform agenttiginiń Vashıngtondaǵy menshikti tilshisi FOX Business-ke silteme jasap.

Elektr energııasynyń baǵasy ótken jylmen salystyrǵanda 6,3 paıyzǵa ósken, al ınflıatsııa 2,4 paıyzdy qurap otyr.

Energetıkalyq aqparat ıýasqarmasynyń málimetterine qaraǵanda, jeltoqsan aıynda elde elektr energııasyna degen baǵa kılovat-saǵat úshin 12,82 tsentke, ıaǵnı 7,1 paıyzǵa artty. Bul málimetter ekonomıka sektorynyń elektr energııasyn tutynatyn barlyq salasyn qamtyp otyr. Olardyń ishinde turǵyn úı, kommertsııa, ónerkásip, kólik sııaqty salalar bar.

Price Futures Group kompanııasynyń naryq taldaýshysy Fıl Flınn elektr energııasy baǵasynyń ósýin ishinara normatıvtik-quqyqtyq bazada kún jáne jel energetıkasy sııaqty jańartylatyn kózderge basymdyq berilýimen túsindirdi.

Onyń pikirinshe, tabıǵı gaz, kómir nemese atom energetıkasy sekildi neǵurlym senimdi kózderge jetkilikti qoldaý kórsetilmeıdi.

— Energojúıe senimdi ári arzan bazalyq qýat kózderinen aıyryldy, elektr stantsııalaryn jańǵyrtý, jańa qubyrlar salý is júzinde múmkin bolmaı qaldy, al keı jaǵdaıda tabıǵı gazdyń ornyna elektr energııasyn qoldaný mindetteldi, — dedi Flınn.

District of Columbia aımaǵynda elektr energııasy baǵasynyń ósimi ózge 50 shtatpen salystyrǵanda eń joǵary boldy — 26,29%.

EIA derekterine sáıkes, ótken jylmen salystyrǵanda elektr energııasyna jalpy shyǵyn eń kóp artqan 10 shtat: Pensılvanııa (+18,93%), Rod-Aılend (+16,32%), Nıý-Djersı (+15,74%), Men (+14,97%), Ogaıo (+14,45%), Merılend (+12,97%), Vashıngton (+12,24%), Kalıfornııa (+12,18%), Indıana (+11,13%) jáne Nıý-Iork (+10,7%).

Buǵan deıin ótken jyly AQSh-tan ketkender sany kelgenderden kóp bolǵany habarlanǵan.