AQSh-ta ekinshi merzimge qaıta saılanǵan Obamany ulyqtaý rásimi ótedi
ASTANA. 20 qańtar. QazAqparat - Búgin AQSh-ta ekinshi tórtjyldyq merzimge qaıta saılanǵan Prezıdent Barak Obama ant qabyldaıdy.
Sonymen qatar Prezıdent ákimshiliginde aýys-túıister bolady, dep habarlaıdy RBK.
Jaqyndaǵy aptalar men aılarda ákimshilikten AQSh Memlekettik hatshysy Hılları Klınton, qorǵanys mınıstri Leon Panetta, qarjy mınıstri Tımotı Gaıtner, ishki ister mınıstri Ken Salazar ketedi dep kútilýde.
Memlekettik hatshy laýazymyna Prezıdent Senattyń halyqaralyq komıtetiniń basshysy Djon Kerrıdi iriktep alǵan eken.
21 qańtarda vashıngtondyq Kapıtolıdiń ońtústik jaǵyndaǵy baspaldaqtarda ótetin saltanatty rásimde burynǵy eki prezıdent - 88 jastaǵy úlken Djordj Býsh jáne 66 jastaǵy kishi Djordj Býsh bolmaıtyn sekildi.
Sonymen qatar sońǵy saılaýda B. Obamanyń básekelesi Mıtt Romnı kelmeıdi dep aıtylýda. Bul óz kezeginde jeńiske jetken qarsylasynyń ulyqtaý sharasyna qatysýdaǵy saıası dástúrdi buzý bolyp tabylady.
