AQSh-ta dúleı daýyldan qaza tapqandar sany artyp jatyr
Daýyl juma kúni AQSh-tyń batysy men ońtústik-shyǵysynda boldy. Bılik birneshe shtatta tótenshe jaǵdaı jarııalady.
Qurbandardyń kópshiligi Mıssýrıde tirkelip otyr: 12 adam sol aımaqta qaıtys boldy. Kanzas shtatynda 8 adam qatty shańdy daýyl saldarynan bolǵan iri apattyń qurbanyna aınaldy.
Arkanzasta úsh adam qaza taýyp, taǵy 32 adam jaraqat aldy. Mıssısıpıde 4 adam, Tehasta 4 adam, Oklahomada 1 adam kóz jumdy.
Ulttyq aýa raıy qyzmetine qarasty kún raıyn boljaý ortalyǵynyń málimetinshe, qazir eń úlken qaýip ońtústik shtattarǵa tónip tur. Tornado taıaý saǵattarda batys Florıda men Djordjııaǵa jetedi dep kútilýde. Meteorologtardyń habarlaýynsha, tornado qarqyndylyǵy azaıyp keledi, biraq keıbir shtattar úshin qaýip áli seıilgen joq.
Eske sala keteıik, buǵan deıin AQSh áýejaıynda American Airlines jolaýshylar ushaǵy órtenip ketkenin jazǵan edik.