AQSh-ta Donald Trampty qoldaý deńgeıi rekordtyq tómen kórsetkishke jetti
ASTANA. KAZINFORM — AQSh prezıdenti Donald Tramptyń saıasatyn qoldaý deńgeıi rekordtyq tómen kórsetkishke jetti. Kongress saılaýyna eki apta qalǵanda amerıkalyqtardyń Demokratııalyq partııany qoldaýy artyp keledi. Bul týraly Report jazdy.
Bul týraly The Washington Post (WP) gazeti, ABC telearnasy jáne Frantsııanyń Ipsos áleýmettaný qyzmeti birlesip júrgizgen saýalnama nátıjelerinde aıtylǵan.
Zertteý derekterine sáıkes, Donald Tramptyń qyzmetin qoldaý deńgeıi 33%-dy quraǵan. Bul shilde aıyndaǵy kórsetkishten 4 paıyzdyq tarmaqqa, al 2025 jylǵy qazandaǵy deńgeıden 8 paıyzdyq tarmaqqa tómen.
AQSh Kongresiniń Ókilder palatasyna baqylaý ornatý jolyndaǵy básekede demokrattar respýblıkashyldardan 8 paıyzdyq tarmaqqa ozyp tur. Shilde aıynda bul aıyrmashylyq 3 paıyzdyq tarmaq bolǵan.
Saýalnamaǵa qatysýshylar respýblıkashyldarǵa degen narazylyqtyń negizgi sebepteri retinde Tramptyń áreketteri men Iranǵa qarsy soǵys saldarynan elde ınflıatsııanyń ósýin ataǵan. Respondentterdiń 65%-y Tegeranǵa qarsy áskerı operatsııany qate sheshim dep sanaıdy.
Sonymen qatar saýalnamaǵa qatysqandardyń 48%-y Tramp 2025 jyly prezıdenttik qyzmetine qaıta oralǵannan keıin ózderiniń qarjylyq jaǵdaıy nasharlaǵanyn málimdegen. Bul — WP men ABC 1986 jyldan beri júrgizgen saýalnamalarda AQSh prezıdentterine qatysty tirkelgen eń joǵary kórsetkish.
Saýalnama 9–13 qazan aralyǵynda AQSh-tyń 18 jastan asqan 2 545 azamatynyń qatysýymen ótkizilgen.
Buǵan deıin Tramp Atlant nemese Tynyq muhıtyn óz atymen ataýdy usynǵan bolatyn.
