Iran aımaqtaǵy AQSh pen Izraıl ýnıversıtetterine soqqy jasaıtynyn eskertti
ASTANA. KAZINFORM - Iran eki joǵary oqý ornyna jasalǵan shabýyldarǵa jaýap retinde aımaqtaǵy ızraıldik jáne amerıkalyq ýnıversıtetterge soqqy berýi múmkin ekenin málimdedi, dep jazady DW.
Eger AQSh ákimshiligi óńirdegi ýnıversıtetteriniń jaýap sharalarynan aman qalǵanyn qalasa, 30 naýryz kúni Tegeran ýaqytymen túske deıin ýnıversıtetterdi bombalaýdy aıyptaýy tıis. Bul týraly Fars agenttigi Islam revolıýtsııasy saqshylar korpýsynyń X áleýmettik jelisindegi málimdemesine silteme jasap habarlady.
Aımaqtaǵy amerıkalyq ýnıversıtetterdiń qyzmetkerlerine, oqytýshylary men stýdentterine, sondaı-aq mańaıdaǵy turǵyndarǵa kampýstardan keminde bir shaqyrym qashyqtyqta bolý usynyldy.
Irandaǵy ýnıversıtetterge soqqy
Iran tarapynyń málimetinshe, shabýyldar Isfahan tehnıkalyq ýnıversıteti men Tegeran ǵylym jáne tehnologııa ýnıversıtetine jasalǵan.
Parsy shyǵanaǵy elderinde amerıkalyq ýnıversıtetterdiń birqatar fılıaldary bar. Atap aıtqanda, Tehas A&M ýnıversıteti Qatarda, al Nıý-Iork ýnıversıteti Birikken Arab Ámirlikterinde jumys isteıdi.
Lıvandaǵy jekemenshik ýnıversıtet qashyqtan oqýǵa kóshti
Osy arada Beırýttaǵy Amerıka ýnıversıteti Islam revolıýtsııasy saqshylar korpýsy málimdemesinen keıin aldaǵy eki kúnge qashyqtan oqytý formatyna kóshetinin habarlady.
- Qazirgi ýaqytta ýnıversıtetke, onyń kampýstary men medıtsınalyq ortalyqtaryna baǵyttalǵan naqty qaýip bar ekenine dálel joq. Soǵan qaramastan saqtyq sharasy retinde dúısenbi men seısenbi kúnderi negizgi qyzmet atqaratyn qyzmetkerlerden basqa barlyq jumys onlaın rejımde júrgiziledi, - dep málimdedi Lıvan astanasynda ornalasqan jekemenshik oqý ornynyń basshylyǵy.
Ǵylym nysanaǵa alyndy
- AQSh pen Izraıldiń Iranǵa qarsy agressııasynyń shynaıy maqsaty — elimizdiń ǵylymı negizi men mádenı murasyn joıý. Ýnıversıtetterge, ǵylymı-zertteý ortalyqtaryna, tarıhı eskertkishterge jáne kórnekti ǵalymdarǵa júıeli túrde soqqy jasalyp jatyr, — dep jazdy Esmaıl Bagaı X áleýmettik jelisinde.
AQSh pen Izraıl Taıaý Shyǵystaǵy áskerı qımyldardy 28 aqpanda Iran aýmaǵyna áýe soqqylaryn jasaýdan bastady. Buǵan jaýap retinde Tegeran Izraılge, Parsy shyǵanaǵynyń birqatar elderine jáne óńirdegi amerıkalyq nysandarǵa zymyran jáne dron shabýyldaryn júzege asyrdy.
Osyǵan deıin Iranda AQSh pen Izraıl soqqylarynan 8 adam mert bolǵany týraly jazdyq.