AQSh-ta demokrattar respýblıkalyq Florıda shtatynda saılaýda jeńiske jetti
ASTANA. KAZINFORM – AQSh-tyń Florıda shtatynda ótken kezekten tys saılaýda demokrat Emılı Gregorı Ókilder palatasyna saılanyp, Respýblıkalyq partııa kandıdatyn jeńdi. Bul týraly Kazinform agenttiginiń Vashıngtondaǵy menshikti tilshisi habarlady.
AQSh prezıdenti respýblıkashyl Djon Meıplsty qoldaǵan. Málimetterge sáıkes, Donald Tramp buǵan deıin poshta arqyly daýys berýdi «alaıaqtyq» dep synaǵanyna qaramastan, ózi osy tásilmen daýys bergen, dep habarlaıdy CBS News.
Daýystardyń basym bóligi sanalǵannan keıin Gregorı qarsylasy Meıplstan 2,4 paıyzdyq tarmaqqa, ıaǵnı 797 daýysqa ozyp shyqty.
Demokrattar bul jeńisti saılaýshylardyń Tramp pen Respýblıkalyq partııadan teris aınala bastaǵanynyń belgisi retinde qabyldady.
— Mar-a-Lago qyzyl okrýgten kókke aınaldy. Bul aralyq saılaý qarsańynda respýblıkashyldardy alańdatýy tıis, — dedi Demokratııalyq partııanyń zańnamalyq naýqandar komıtetiniń prezıdenti Hızer Ýılıams.
Onyń aıtýynsha, bul Tramp qyzmetke kiriskennen beri demokrattar respýblıkashyldardan qaıtaryp alǵan 29-shy okrýg.
Buǵan deıin habarlanǵandaı, bıyl 3 qarashada Ókilder palatasy men Senatqa saılaý ótip, AQSh Kongresin qaı partııa baqylaıtyny anyqtalady.
Aıta ketelik AQSh-ta ishki qaýipsizdik mınıstri laýazymyna Markýeın Mallın taǵaıyndaldy.
