AQSh-ta daýylǵa baılanysty 2000-nan astam reıs toqtady
ASTANA.KAZINFORM - AQSh-ta 2000-nan astam ishki reıs toqtatyldy. Al 5000 halyqaralyq reıs keıinge qaldyryldy, dep habarlaıdy FOX Business.
Seısenbi kúni AQSh-tyń soltústik-shyǵysyndaǵy keıbir aımaqtarda joıqyn daýyl sý tasqyny men tornadoǵa ulasýy múmkin ekeni eskertildi.
Meteorologtar men tótenshe jaǵdaılar qyzmeti eki tornado tirkelgenin habarlady. Onyń bireýi Pensılvanııanyń soltústik-shyǵysynda, ekinshisi Nıý-Djersıdiń soltústiginde.
Nıý-Iork, Boston, Fıladelfııa jáne Vashıngton áýejaılarynda jumys toqtatyldy.
Federaldy avıatsııa ákimshiligi naızaǵaıǵa baılanysty kem degende AQSh-tyń segiz áýejaıynda, sonyń ishinde Baltımor-Vashıngton halyqaralyq áýejaıynda (Merılend), Boston Logan halyqaralyq áýejaıynda (Massachýsets), Nıýark Lıbertı halyqaralyq áýejaıynda (Nıý-Djersı), Teterboro áýejaıy (Nıý-Djersı), LaGýardııa áýejaıy (Nıý-Iork), Vestchester okrýginiń áýejaıy (Nıý-Iork), Fıladelfııa halyqaralyq áýejaıy (Pensılvanııa), Ronald Reıgan atyndaǵy Vashıngton ulttyq áýejaıy (Vırdjınııa) jáne Vashıngton Dalles halyqaralyq áýejaıynda (Vırdjınııa) ushýdy toqtatatynyn jarııalady.
Nıý-Iork qalasynda shamamen 600 reıs toqtatyldy, al 500-den astam reıs keshiktirildi.
Daýyl kúsheıgen saıyn bul sandar artýy múmkin.
Áýe kompanııalary reısi toqtatylǵan jolaýshylar jeksenbige deıin bıletterin qaıta brondaı alatynyn nemese aqshasyn qaıtaryp ala alatynyn málimdedi.
Buǵan deıin Kalıfornııadaǵy orman órti 650 gektar aýmaqty sharpyǵanyn habarlaǵan edik.
