AQSh-ta COVID-19 juqtyrǵandardyń sany 10 mln adamnan asty

AQSh. QazAqparat – Qurama Shtattar álemde koronavırýs juqtyrǵan naýqastardyń eń kóp sany tirkelgen birinshi elge aınaldy. Reuters agenttiginiń jeksenbi, 8 qarasha kúni jasaǵan esebine sáıkes, pandemııa bastalǵan kezden beri qaýipti vırýsty 10 mıllıonnan astam adam juqtyrǵan. Bul týraly QazAqparat Reuters agenttigine silteme jasap habarlaıdy.

Bul kúni álem boıynsha aýrý juqtyrǵandardyń jalpy sany 50 mıllıon adamnan asty.

Sońǵy on táýliktiń ishinde AQSh-ta aýrý juqtyrýdyń bir mıllıonǵa jýyq oqıǵasy tirkelgen, bul 293 kún buryn Vashıngton shtatynda jańa koronavırýs ınfektsııasy týraly alǵashqy habarlamanyń jarııalaný sátinen bergi eń joǵary kórsetkish bolyp tabylady.

Ótken jeksenbide elde vırýs juqtyrýdyń 131 420 jańa oqıǵasy tirkeldi. Reuters agenttiginiń esebi boıynsha, bul -koronavırýs ınfektsııasynyń jetinshi kún qatarynan alty tańbaly ósim qarqynyn jalǵastyrýy.

Koronavırýs ınfektsııasynan ólim oqıǵalarynyń jalpy sany 237 myńdy qurady.

Reuters esebi boıynsha, kún saıyn koronavırýstan tirkeletin 11 ólimniń ishinde bireýi AQSh-ta bolady. Osylaısha, sońǵy bes kúnde búkil el boıynsha ólim oqıǵalarynyń sany 1 myńnan asyp otyr.

Densaýlyq saqtaý sarapshylarynyń aıtýynsha, aldaǵy tórt-alty aptanyń ishinde elde aýrý juqtyrý sanynyń kúrt ósýine baılanysty ólim oqıǵalary sanynyń artýy kútilip otyr.

Ótken senbide AQSh eliniń jańa saılanǵan prezıdenti Djo Baıden jurtshylyq aldynda sóılegen sózinde koronavırýs ınfektsııasymen kúresti aldyńǵy qatarǵa qoıatyndyǵyn atap ótken bolatyn.