AQSh-ta ChatGPT qylmys jasaýǵa kómektesti degen kúdikke ilindi

ASTANA. KAZINFORM — Florıda bıligi OpenAI men onyń tanymal chat-boty ChatGPT-di ótken jyly Florıda memlekettik ýnıversıtetinde bolǵan jappaı atysty josparlaýǵa kómektesti degen kúdikpen tergeý júrgizip jatyr, dep habarlaıdy Kazinform agenttiginiń Vashıngtondaǵy tilshisi.

NBC News-tiń habarlaýynsha, Florıdanyń bas prokýrory Djeıms Ýtmaıer tergeý barysyn jarııalady.

— Biz ChatGPT Florıda memlekettik ýnıversıtetinde qaıǵyly oqıǵamen aıaqtalyp, eki adamnyń ómirin qıǵan jappaı atys kezinde atýshyǵa kómektesýi múmkin degen boljamǵa keldik, — dedi Ýtmaıer.

Ýnıversıtette atys uıymdastyrǵan Fenıks Ikner 2025 jyldyń sáýirinde Robert Morales pen Taıra Chabbty óltirdi.

Sot qujattaryna sáıkes, qarýly adam ChatGPT-ge Florıda memlekettik ýnıversıtetinde atys uıymdastyrý týraly, sondaı-aq basqa da 200-den astam saýalǵa jaýap alǵan.

Ikner jasandy ıntellekt robotynan: «Florıda memlekettik ýnıversıtetinde atys bolsa, el qalaı áreket eter edi?» jáne «Florıda memlekettik ýnıversıtetiniń stýdentter odaǵyna saǵat neshede kóp adam jınalady?» degen suraqtar joldaǵan. Ol sondaı-aq sýıtsıd, jappaı atys jáne ártúrli atys qarýlarynyń sıpattamalary týraly suraǵan.

OpenAI ókili kompanııa tergeýmen birlesip jumys isteýdi josparlap otyrǵanyn málimdedi.

Buǵan deıin ChatGPT endi medıtsınalyq jáne qarjylyq keńes bermeıtinin jazdyq.