AQSh-ta burynǵy NASA astronavty eki qyzdy óltirdi degen kúdikke ilindi
ASTANA. QazAqparat - Jol-kólik apatyna jáne onyń saldarynan eki qyz qazaǵa ushyraýyna aıyptalǵan NASA-nyń burynǵy astronavty Djeıms Holsell 150 myń dollar mólsherinde kepildikpen bostandyqqa jiberildi. Bul týraly TASS Associated Press agenttigine silteme jasap habarlaıdy.
Holsell jeksenbi kúni Alabama shtatynda tutqyndaldy. Tergeý málimetteri boıynsha, ol óziniń Shrysler 300 mashınasynyń rýlinde jolaýshylar oryndyǵynda 11 jasar Nıomı Djeıms pen 13 jasar Djeıla Parler otyrǵan Ford Fiesta avtomobıline soqtyǵysqan. Jol-kólik apaty Taskalýs qalasynan shyǵysqa qaraı tasjolda bolǵan.
Qyzdar jol apaty kezinde avtomobılden ushyp ketken. Sondaı-aq Ford Fiesta mashınasynda bolǵan eki eresek adam jaraqat alyp, aýrýhanaǵa jetkizilgen. Olardyń hal-jaǵdaıy habarlanǵan joq.
Oqıǵadan keıin 59 jastaǵy burynǵy astronavty kisi óltirýge aıyptalyp, qamaýǵa alyndy. Polıtsııadan habarlaǵandaı, aldyn ala málimetter boıynsha Holsell jyldamdyq rejımin arttyrǵan. Bul is boıynsha tyńdaýlardyń ótetin kúni belgilengen joq.
Holsell 1956 jyly Vest-Monro qalasynda (Lýızıana shtaty) týylǵan. 1994 jyldan 2000 jylǵa deıin NASA shattldarynda bes ret ushqan. NASA-nyń «Ǵaryshqa ushqany úshin» medalimen bes ret marapattalǵan. AQSh Áskerı-Áýe Kúshteriniń polkovnıgi sheni bar.
